Bāhiraaniccanandikkhayasutta

“Rūpe, bhikkhave, yoniso manasi karotha, rūpāniccatañca yathābhūtaṁ samanupassatha.

Rūpe, bhikkhave, bhikkhu yoniso manasikaronto, rūpāniccatañca yathābhūtaṁ samanupassanto rūpesupi nibbindati.

Nandikkhayā rāgakkhayo;

rāgakkhayā nandikkhayo.

Nandirāgakkhayā cittaṁ suvimuttanti vuccati.

Sadde …

gandhe …

rase …

phoṭṭhabbe …

dhamme, bhikkhave, yoniso manasi karotha, dhammāniccatañca yathābhūtaṁ samanupassatha.

Dhamme, bhikkhave, bhikkhu yoniso manasikaronto, dhammāniccatañca yathābhūtaṁ samanupassanto dhammesupi nibbindati.

Nandikkhayā rāgakkhayo;

rāgakkhayā nandikkhayo.

Nandirāgakkhayā cittaṁ suvimuttanti vuccatī”ti.

Catutthaṁ.