Aṅgasutta

“Pañcimāni, bhikkhave, mātugāmassa balāni.

Katamāni pañca?

Rūpabalaṁ, bhogabalaṁ, ñātibalaṁ, puttabalaṁ, sīlabalaṁ.

Rūpabalena ca, bhikkhave, mātugāmo samannāgato hoti, na ca bhogabalena—

evaṁ so tenaṅgena aparipūro hoti.

Yato ca kho, bhikkhave, mātugāmo rūpabalena ca samannāgato hoti, bhogabalena ca—

evaṁ so tenaṅgena paripūro hoti.

Rūpabalena ca, bhikkhave, mātugāmo samannāgato hoti, bhogabalena ca, na ca ñātibalena—

evaṁ so tenaṅgena aparipūro hoti.

Yato ca kho, bhikkhave, mātugāmo rūpabalena ca samannāgato hoti, bhogabalena ca, ñātibalena ca—

evaṁ so tenaṅgena paripūro hoti.

Rūpabalena ca, bhikkhave, mātugāmo samannāgato hoti, bhogabalena ca, ñātibalena ca, na ca puttabalena—

evaṁ so tenaṅgena aparipūro hoti.

Yato ca kho, bhikkhave, mātugāmo rūpabalena ca samannāgato hoti, bhogabalena ca, ñātibalena ca, puttabalena ca—

evaṁ so tenaṅgena paripūro hoti.

Rūpabalena ca, bhikkhave, mātugāmo samannāgato hoti, bhogabalena ca, ñātibalena ca, puttabalena ca, na ca sīlabalena—

evaṁ so tenaṅgena aparipūro hoti.

Yato ca kho, bhikkhave, mātugāmo rūpabalena ca samannāgato hoti, bhogabalena ca, ñātibalena ca, puttabalena ca, sīlabalena ca—

evaṁ so tenaṅgena paripūro hoti.

Imāni kho, bhikkhave, pañca mātugāmassa balānī”ti.

Pañcamaṁ.