Mānasasutta

Evaṁ me sutaṁ—

ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

Atha kho māro pāpimā yena bhagavā tenupasaṅkami; upasaṅkamitvā bhagavantaṁ gāthāya ajjhabhāsi:

“Antalikkhacaro pāso,

yvāyaṁ carati mānaso;

Tena taṁ bādhayissāmi,

na me samaṇa mokkhasī”ti.

“Rūpā saddā rasā gandhā,

Phoṭṭhabbā ca manoramā;

Ettha me vigato chando,

Nihato tvamasi antakā”ti.

Atha kho māro pāpimā “jānāti maṁ bhagavā, jānāti maṁ sugato”ti dukkhī dummano tatthevantaradhāyīti.