Sabhiyakaccānasutta

Ekaṁ samayaṁ āyasmā sabhiyo kaccāno ñātike viharati giñjakāvasathe.

Atha kho vacchagotto paribbājako yenāyasmā sabhiyo kaccāno tenupasaṅkami; upasaṅkamitvā āyasmatā sabhiyena kaccānena saddhiṁ sammodi.

Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vacchagotto paribbājako āyasmantaṁ sabhiyaṁ kaccānaṁ etadavoca:

“kiṁ nu kho bho, kaccāna, hoti tathāgato paraṁ maraṇā”ti?

“Abyākataṁ kho etaṁ, vaccha, bhagavatā:

‘hoti tathāgato paraṁ maraṇā’”ti.

“Kiṁ pana, bho kaccāna, na hoti tathāgato paraṁ maraṇā”ti?

“Etampi kho, vaccha, abyākataṁ bhagavatā:

‘na hoti tathāgato paraṁ maraṇā’”ti.

“Kiṁ nu kho, bho kaccāna, hoti ca na ca hoti tathāgato paraṁ maraṇā”ti?

“Abyākataṁ kho etaṁ, vaccha, bhagavatā:

‘hoti ca na ca hoti tathāgato paraṁ maraṇā’”ti.

“Kiṁ pana, bho kaccāna, neva hoti na na hoti tathāgato paraṁ maraṇā”ti?

“Etampi kho, vaccha, abyākataṁ bhagavatā:

‘neva hoti na na hoti tathāgato paraṁ maraṇā’”ti.

“‘Kiṁ nu kho, bho kaccāna, hoti tathāgato paraṁ maraṇā’ti, iti puṭṭho samāno:

‘abyākataṁ kho etaṁ, vaccha, bhagavatā—

hoti tathāgato paraṁ maraṇā’ti vadesi.

‘Kiṁ pana, bho kaccāna, na hoti tathāgato paraṁ maraṇā’ti, iti puṭṭho samāno:

‘abyākataṁ kho etaṁ, vaccha, bhagavatā—

na hoti tathāgato paraṁ maraṇā’ti vadesi.

‘Kiṁ nu kho, bho kaccāna, hoti ca na ca hoti tathāgato paraṁ maraṇā’ti, iti puṭṭho samāno:

‘abyākataṁ kho etaṁ, vaccha, bhagavatā—

hoti ca na ca hoti tathāgato paraṁ maraṇā’ti vadesi.

‘Kiṁ pana, bho kaccāna, neva hoti na na hoti tathāgato paraṁ maraṇā’ti, iti puṭṭho samāno:

‘etampi kho, vaccha, abyākataṁ bhagavatā—

neva hoti na na hoti tathāgato paraṁ maraṇā’ti vadesi.

Ko nu kho, bho kaccāna, hetu, ko paccayo, yenetaṁ abyākataṁ samaṇena gotamenā”ti?

“Yo ca, vaccha, hetu, yo ca paccayo paññāpanāya rūpīti vā arūpīti vā saññīti vā asaññīti vā nevasaññīnāsaññīti vā, so ca hetu, so ca paccayo sabbena sabbaṁ sabbathā sabbaṁ aparisesaṁ nirujjheyya.

Kena naṁ paññāpayamāno paññāpeyya rūpīti vā arūpīti vā saññīti vā asaññīti vā nevasaññīnāsaññīti vā”ti.

“Kīvaciraṁ pabbajitosi, bho kaccānā”ti?

“Naciraṁ, āvuso, tīṇi vassānī”ti.

“Yassapassa, āvuso, etamettakena ettakameva tampassa bahu, ko pana vādo evaṁ abhikkante”ti.

Ekādasamaṁ.

Abyākatavaggo paṭhamo.

Tassuddānaṁ

Khemātherī anurādho,

sāriputtoti koṭṭhiko;

Moggallāno ca vaccho ca,

kutūhalasālānando;

Sabhiyo ekādasamanti.

Abyākatasaṁyuttaṁ samattaṁ.

Tassuddānaṁ

Saḷāyatanavedanā,

mātugāmo jambukhādako;

Sāmaṇḍako moggallāno,

citto gāmaṇi saṅkhataṁ;

Abyākatanti dasadhāti.

Saḷāyatanavaggo catuttho.

Saḷāyatanavaggasaṁyuttapāḷi niṭṭhitā.