Amatasutta

Sāvatthinidānaṁ.

“Catūsu, bhikkhave, satipaṭṭhānesu suppatiṭṭhitacittā viharatha.

Mā vo amataṁ panassa.

Katamesu catūsu?

Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ;

vedanāsu …pe…

citte …pe…

dhammesu dhammānupassī viharati ātāpī sampajāno satimā, vineyya loke abhijjhādomanassaṁ.

Imesu, bhikkhave, catūsu satipaṭṭhānesu suppatiṭṭhitacittā viharatha.

Mā vo amataṁ panassā”ti.

Paṭhamaṁ.