Paṭhamasaṅkhittasutta

“Pañcimāni, bhikkhave, indriyāni.

Katamāni pañca?

Saddhindriyaṁ …pe… paññindriyaṁ—

imāni kho, bhikkhave, pañcindriyāni.

Imesaṁ kho, bhikkhave, pañcannaṁ indriyānaṁ samattā paripūrattā arahaṁ hoti, tato mudutarehi anāgāmī hoti, tato mudutarehi sakadāgāmī hoti, tato mudutarehi sotāpanno hoti, tato mudutarehi dhammānusārī hoti, tato mudutarehi saddhānusārī hotī”ti.

Dutiyaṁ.