Patiṭṭhitasutta

“Ekadhamme patiṭṭhitassa, bhikkhave, bhikkhuno pañcindriyāni bhāvitāni honti subhāvitāni.

Katamasmiṁ ekadhamme?

Appamāde.

Katamo ca bhikkhave, appamādo?

Idha, bhikkhave, bhikkhu cittaṁ rakkhati āsavesu ca sāsavesu ca dhammesu.

Tassa cittaṁ rakkhato āsavesu ca sāsavesu ca dhammesu saddhindriyampi bhāvanāpāripūriṁ gacchati.

Vīriyindriyampi bhāvanāpāripūriṁ gacchati.

Satindriyampi bhāvanāpāripūriṁ gacchati.

Samādhindriyampi bhāvanāpāripūriṁ gacchati.

Paññindriyampi bhāvanāpāripūriṁ gacchati.

Evampi kho, bhikkhave, ekadhamme patiṭṭhitassa bhikkhuno pañcindriyāni bhāvitāni honti subhāvitānī”ti.

Chaṭṭhaṁ.