Daṭṭhabbasutta

“Pañcimāni, bhikkhave, indriyāni.

Katamāni pañca?

Saddhindriyaṁ …pe… paññindriyaṁ.

Kattha ca, bhikkhave, saddhindriyaṁ daṭṭhabbaṁ?

Catūsu sotāpattiyaṅgesu—

ettha saddhindriyaṁ daṭṭhabbaṁ.

Kattha ca, bhikkhave, vīriyindriyaṁ daṭṭhabbaṁ?

Catūsu sammappadhānesu—

ettha vīriyindriyaṁ daṭṭhabbaṁ.

Kattha ca, bhikkhave, satindriyaṁ daṭṭhabbaṁ?

Catūsu satipaṭṭhānesu—

ettha satindriyaṁ daṭṭhabbaṁ.

Kattha ca, bhikkhave, samādhindriyaṁ daṭṭhabbaṁ?

Catūsu jhānesu—

ettha samādhindriyaṁ daṭṭhabbaṁ.

Kattha ca, bhikkhave, paññindriyaṁ daṭṭhabbaṁ?

Catūsu ariyasaccesu—

ettha paññindriyaṁ daṭṭhabbaṁ.

Imāni kho, bhikkhave, pañcindriyānī”ti.

Aṭṭhamaṁ.