Bhikkhakasutta

Sāvatthinidānaṁ.

Atha kho bhikkhako brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.

Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho bhikkhako brāhmaṇo bhagavantaṁ etadavoca:

“ahampi kho, bho gotama, bhikkhako, bhavampi bhikkhako, idha no kiṁ nānākaraṇan”ti?

“Na tena bhikkhako hoti,

yāvatā bhikkhate pare;

Vissaṁ dhammaṁ samādāya,

bhikkhu hoti na tāvatā.

Yodha puññañca pāpañca,

bāhitvā brahmacariyaṁ;

Saṅkhāya loke carati,

sa ve bhikkhūti vuccatī”ti.

Evaṁ vutte, bhikkhako brāhmaṇo bhagavantaṁ etadavoca:

“abhikkantaṁ, bho gotama, abhikkantaṁ, bho gotama …pe…

upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.