Āsaṁsasutta

“Tayome, bhikkhave, puggalā santo saṁvijjamānā lokasmiṁ.

Katame tayo?

Nirāso, āsaṁso, vigatāso.

Katamo ca, bhikkhave puggalo nirāso?

Idha, bhikkhave, ekacco puggalo nīce kule paccājāto hoti, caṇḍālakule vā venakule vā nesādakule vā rathakārakule vā pukkusakule vā dalidde appannapānabhojane kasiravuttike, yattha kasirena ghāsacchādo labbhati.

So ca hoti dubbaṇṇo duddasiko okoṭimako bavhābādho kāṇo vā kuṇī vā khañjo vā pakkhahato vā, na lābhī annassa pānassa vatthassa yānassa mālāgandhavilepanassa seyyāvasathapadīpeyyassa.

So suṇāti:

‘itthannāmo kira khattiyo khattiyehi khattiyābhisekena abhisitto’ti.

Tassa na evaṁ hoti:

‘kudāssu nāma mampi khattiyā khattiyābhisekena abhisiñcissantī’ti.

Ayaṁ vuccati, bhikkhave, puggalo nirāso.

Katamo ca, bhikkhave, puggalo āsaṁso?

Idha, bhikkhave, rañño khattiyassa muddhāvasittassa jeṭṭho putto hoti ābhiseko anabhisitto acalappatto.

So suṇāti:

‘itthannāmo kira khattiyo khattiyehi khattiyābhisekena abhisitto’ti.

Tassa evaṁ hoti:

‘kudāssu nāma mampi khattiyā khattiyābhisekena abhisiñcissantī’ti.

Ayaṁ vuccati, bhikkhave, puggalo āsaṁso.

Katamo ca, bhikkhave, puggalo vigatāso?

Idha, bhikkhave, rājā hoti khattiyo muddhāvasitto.

So suṇāti:

‘itthannāmo kira khattiyo khattiyehi khattiyābhisekena abhisitto’ti.

Tassa na evaṁ hoti:

‘kudāssu nāma mampi khattiyā khattiyābhisekena abhisiñcissantī’ti.

Taṁ kissa hetu?

Yā hissa, bhikkhave, pubbe anabhisittassa abhisekāsā sā paṭippassaddhā.

Ayaṁ vuccati, bhikkhave, puggalo vigatāso.

Ime kho, bhikkhave, tayo puggalā santo saṁvijjamānā lokasmiṁ.

Evamevaṁ kho, bhikkhave, tayo puggalā santo saṁvijjamānā bhikkhūsu.

Katame tayo?

Nirāso, āsaṁso, vigatāso.

Katamo ca, bhikkhave, puggalo nirāso?

Idha, bhikkhave, ekacco puggalo dussīlo hoti pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto.

So suṇāti:

‘itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.

Tassa na evaṁ hoti:

‘kudāssu nāma ahampi āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissāmī’ti.

Ayaṁ vuccati, bhikkhave, puggalo nirāso.

Katamo ca, bhikkhave, puggalo āsaṁso?

Idha, bhikkhave, bhikkhu sīlavā hoti kalyāṇadhammo.

So suṇāti:

‘itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.

Tassa evaṁ hoti:

‘kudāssu nāma ahampi āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissāmī’ti.

Ayaṁ vuccati, bhikkhave, puggalo āsaṁso.

Katamo ca, bhikkhave, puggalo vigatāso?

Idha, bhikkhave, bhikkhu arahaṁ hoti khīṇāsavo.

So suṇāti:

‘itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.

Tassa na evaṁ hoti:

‘kudāssu nāma ahampi āsavānaṁ khayā …pe… sacchikatvā upasampajja viharissāmī’ti.

Taṁ kissa hetu?

Yā hissa, bhikkhave, pubbe avimuttassa vimuttāsā sā paṭippassaddhā.

Ayaṁ vuccati, bhikkhave, puggalo vigatāso.

Ime kho, bhikkhave, tayo puggalā santo saṁvijjamānā bhikkhūsū”ti.

Tatiyaṁ.