Pabbatarājasutta

“Himavantaṁ, bhikkhave, pabbatarājaṁ nissāya mahāsālā tīhi vaḍḍhīhi vaḍḍhanti.

Katamāhi tīhi?

Sākhāpattapalāsena vaḍḍhanti, tacapapaṭikāya vaḍḍhanti, pheggusārena vaḍḍhanti.

Himavantaṁ, bhikkhave, pabbatarājaṁ nissāya mahāsālā imāhi tīhi vaḍḍhīhi vaḍḍhanti.

Evamevaṁ kho, bhikkhave, saddhaṁ kulapatiṁ nissāya anto jano tīhi vaḍḍhīhi vaḍḍhati.

Katamāhi tīhi?

Saddhāya vaḍḍhati, sīlena vaḍḍhati, paññāya vaḍḍhati.

Saddhaṁ, bhikkhave, kulapatiṁ nissāya anto jano imāhi tīhi vaḍḍhīhi vaḍḍhatīti.

Yathāpi pabbato selo,

araññasmiṁ brahāvane;

Taṁ rukkhā upanissāya,

vaḍḍhante te vanappatī.

Tatheva sīlasampannaṁ,

saddhaṁ kulapatiṁ idha;

Upanissāya vaḍḍhanti,

puttadārā ca bandhavā;

Amaccā ñātisaṅghā ca,

ye cassa anujīvino.

Tyāssa sīlavato sīlaṁ,

cāgaṁ sucaritāni ca;

Passamānānukubbanti,

attamatthaṁ vicakkhaṇā.

Idha dhammaṁ caritvāna,

maggaṁ sugatigāminaṁ;

Nandino devalokasmiṁ,

modanti kāmakāmino”ti.

Navamaṁ.