Anusotasutta

“Cattārome, bhikkhave, puggalā santo saṁvijjamānā lokasmiṁ.

Katame cattāro?

Anusotagāmī puggalo, paṭisotagāmī puggalo, ṭhitatto puggalo, tiṇṇo pāraṅgato thale tiṭṭhati brāhmaṇo.

Katamo ca, bhikkhave, anusotagāmī puggalo?

Idha, bhikkhave, ekacco puggalo kāme ca paṭisevati, pāpañca kammaṁ karoti.

Ayaṁ vuccati, bhikkhave, anusotagāmī puggalo.

Katamo ca, bhikkhave, paṭisotagāmī puggalo?

Idha, bhikkhave, ekacco puggalo kāme ca nappaṭisevati, pāpañca kammaṁ na karoti, sahāpi dukkhena sahāpi domanassena assumukhopi rudamāno paripuṇṇaṁ parisuddhaṁ brahmacariyaṁ carati.

Ayaṁ vuccati, bhikkhave, paṭisotagāmī puggalo.

Katamo ca, bhikkhave, ṭhitatto puggalo?

Idha, bhikkhave, ekacco puggalo pañcannaṁ orambhāgiyānaṁ saṁyojanānaṁ parikkhayā opapātiko hoti, tattha parinibbāyī, anāvattidhammo tasmā lokā.

Ayaṁ vuccati, bhikkhave, ṭhitatto puggalo.

Katamo ca, bhikkhave, puggalo tiṇṇo pāraṅgato thale tiṭṭhati brāhmaṇo?

Idha, bhikkhave, ekacco puggalo āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.

Ayaṁ vuccati, bhikkhave, puggalo tiṇṇo pāraṅgato thale tiṭṭhati brāhmaṇo.

Ime kho, bhikkhave, cattāro puggalā santo saṁvijjamānā lokasminti.

Ye keci kāmesu asaññatā janā,

Avītarāgā idha kāmabhogino;

Punappunaṁ jātijarūpagāmi te,

Taṇhādhipannā anusotagāmino.

Tasmā hi dhīro idhupaṭṭhitassatī,

Kāme ca pāpe ca asevamāno;

Sahāpi dukkhena jaheyya kāme,

Paṭisotagāmīti tamāhu puggalaṁ.

Yo ve kilesāni pahāya pañca,

Paripuṇṇasekho aparihānadhammo;

Cetovasippatto samāhitindriyo,

Sa ve ṭhitattoti naro pavuccati.

Paroparā yassa samecca dhammā,

Vidhūpitā atthagatā na santi;

Sa ve muni vusitabrahmacariyo,

Lokantagū pāragatoti vuccatī”ti.

Pañcamaṁ.