Paṭhamavagga

Vuttañhetaṁ bhagavatā vuttamarahatāti me sutaṁ:

“Tisso imā, bhikkhave, vedanā.

Katamā tisso?

Sukhā vedanā, dukkhā vedanā, adukkhamasukhā vedanā.

Sukhā, bhikkhave, vedanā dukkhato daṭṭhabbā;

dukkhā vedanā sallato daṭṭhabbā;

adukkhamasukhā vedanā aniccato daṭṭhabbā.

Yato kho, bhikkhave, bhikkhuno sukhā vedanā dukkhato diṭṭhā hoti, dukkhā vedanā sallato diṭṭhā hoti, adukkhamasukhā vedanā aniccato diṭṭhā hoti;

ayaṁ vuccati, bhikkhave, ‘bhikkhu ariyo, sammaddaso, acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā’”ti.

Etamatthaṁ bhagavā avoca.

Tatthetaṁ iti vuccati:

“Yo sukhaṁ dukkhato adda,

Dukkhamaddakkhi sallato;

Adukkhamasukhaṁ santaṁ,

Adakkhi naṁ aniccato.

Sa ve sammaddaso bhikkhu,

yato tattha vimuccati;

Abhiññāvosito santo,

sa ve yogātigo munī”ti.

Ayampi attho vutto bhagavatā, iti me sutanti.

Catutthaṁ.