Pārāyanānugītigāthā

“Pārāyanamanugāyissaṁ,

(iccāyasmā piṅgiyo)

Yathāddakkhi tathākkhāsi;

Vimalo bhūrimedhaso,

Nikkāmo nibbano nāgo;

Kissa hetu musā bhaṇe.

Pahīnamalamohassa,

mānamakkhappahāyino;

Handāhaṁ kittayissāmi,

giraṁ vaṇṇūpasañhitaṁ.

Tamonudo buddho samantacakkhu,

Lokantagū sabbabhavātivatto;

Anāsavo sabbadukkhappahīno,

Saccavhayo brahme upāsito me.

Dijo yathā kubbanakaṁ pahāya,

Bahupphalaṁ kānanamāvaseyya;

Evampahaṁ appadasse pahāya,

Mahodadhiṁ haṁsoriva ajjhapatto.

Ye me pubbe viyākaṁsu,

Huraṁ gotamasāsanā;

Iccāsi iti bhavissati,

Sabbaṁ taṁ itihītihaṁ;

Sabbaṁ taṁ takkavaḍḍhanaṁ.

Eko tamanudāsino,

jutimā so pabhaṅkaro;

Gotamo bhūripaññāṇo,

gotamo bhūrimedhaso.

Yo me dhammamadesesi,

Sandiṭṭhikamakālikaṁ;

Taṇhakkhayamanītikaṁ,

Yassa natthi upamā kvaci”.

“Kiṁ nu tamhā vippavasasi,

muhuttamapi piṅgiya;

Gotamā bhūripaññāṇā,

gotamā bhūrimedhasā.

Yo te dhammamadesesi,

Sandiṭṭhikamakālikaṁ;

Taṇhakkhayamanītikaṁ,

Yassa natthi upamā kvaci”.

“Nāhaṁ tamhā vippavasāmi,

Muhuttamapi brāhmaṇa;

Gotamā bhūripaññāṇā,

Gotamā bhūrimedhasā.

Yo me dhammamadesesi,

Sandiṭṭhikamakālikaṁ;

Taṇhakkhayamanītikaṁ,

Yassa natthi upamā kvaci.

Passāmi naṁ manasā cakkhunāva,

Rattindivaṁ brāhmaṇa appamatto;

Namassamāno vivasemi rattiṁ,

Teneva maññāmi avippavāsaṁ.

Saddhā ca pīti ca mano sati ca,

Nāpentime gotamasāsanamhā;

Yaṁ yaṁ disaṁ vajati bhūripañño,

Sa tena teneva natohamasmi.

Jiṇṇassa me dubbalathāmakassa,

Teneva kāyo na paleti tattha;

Saṅkappayantāya vajāmi niccaṁ,

Mano hi me brāhmaṇa tena yutto.

Paṅke sayāno pariphandamāno,

Dīpā dīpaṁ upaplaviṁ;

Athaddasāsiṁ sambuddhaṁ,

Oghatiṇṇamanāsavaṁ”.

“Yathā ahū vakkali muttasaddho,

Bhadrāvudho āḷavigotamo ca;

Evamevaṁ tvampi pamuñcassu saddhaṁ,

Gamissasi tvaṁ piṅgiya maccudheyyassa pāraṁ”.

“Esa bhiyyo pasīdāmi,

Sutvāna munino vaco;

Vivaṭṭacchado sambuddho,

Akhilo paṭibhānavā.

Adhideve abhiññāya,

Sabbaṁ vedi varovaraṁ;

Pañhānantakaro satthā,

Kaṅkhīnaṁ paṭijānataṁ.

Asaṁhīraṁ asaṅkuppaṁ,

Yassa natthi upamā kvaci;

Addhā gamissāmi na mettha kaṅkhā,

Evaṁ maṁ dhārehi adhimuttacittan”ti.

Pārāyanavaggo pañcamo.

Suttuddānaṁ

Urago dhaniyopi ca,

Khaggavisāṇo kasi ca;

Cundo bhavo punadeva,

Vasalo ca karaṇīyañca;

Hemavato atha yakkho,

Vijayasuttaṁ munisuttavaranti.

Paṭhamakaṭṭhavaro varavaggo,

Dvādasasuttadharo suvibhatto;

Desito cakkhumatā vimalena,

Suyyati vaggavaro uragoti.

Ratanāmagandho hirimaṅgalanāmo,

Sucilomakapilo ca brāhmaṇadhammo;

Nāvā kiṁsīlauṭṭhahano ca,

Rāhulo ca punapi vaṅgīso.

Sammāparibbājanīyopi cettha,

Dhammikasuttavaro suvibhatto;

Cuddasasuttadharo dutiyamhi,

Cūḷakavaggavaroti tamāhu.

Pabbajjapadhānasubhāsitanāmo,

Pūraḷāso punadeva māgho ca;

Sabhiyaṁ keṇiyameva sallanāmo,

Vāseṭṭhavaro kālikopi ca.

Nālakasuttavaro suvibhatto,

Taṁ anupassī tathā punadeva;

Dvādasasuttadharo tatiyamhi,

Suyyati vaggavaro mahānāmo.

Kāmaguhaṭṭhakaduṭṭhakanāmā,

Suddhavaro paramaṭṭhakanāmo;

Jarā mettiyavaro suvibhatto,

Pasūramāgaṇḍiyā purābhedo.

Kalahavivādo ubho viyuhā ca,

Tuvaṭakaattadaṇḍasāriputtā;

Soḷasasuttadharo catutthamhi,

Aṭṭhakavaggavaroti tamāhu.

Magadhe janapade ramaṇīye,

Desavare katapuññanivese;

Pāsāṇakacetiyavare suvibhatte,

Vasi bhagavā gaṇaseṭṭho.

Ubhayavāsamāgatiyamhi,

Dvādasayojaniyā parisāya;

Soḷasabrāhmaṇānaṁ kira puṭṭho,

Pucchāya soḷasapañhakammiyā;

Nippakāsayi dhammamadāsi.

Atthapakāsakabyañjanapuṇṇaṁ,

Dhammamadesesi parakhemajaniyaṁ;

Lokahitāya jino dvipadaggo,

Suttavaraṁ bahudhammavicitraṁ;

Sabbakilesapamocanahetuṁ,

Desayi suttavaraṁ dvipadaggo.

Byañjanamatthapadaṁ samayuttaṁ,

Akkharasaññitaopamagāḷhaṁ;

Lokavicāraṇañāṇapabhaggaṁ,

Desayi suttavaraṁ dvipadaggo.

Rāgamale amalaṁ vimalaggaṁ,

Dosamale amalaṁ vimalaggaṁ;

Mohamale amalaṁ vimalaggaṁ,

Lokavicāraṇañāṇapabhaggaṁ;

Desayi suttavaraṁ dvipadaggo.

Klesamale amalaṁ vimalaggaṁ,

Duccaritamale amalaṁ vimalaggaṁ;

Lokavicāraṇañāṇapabhaggaṁ,

Desayi suttavaraṁ dvipadaggo.

Āsavabandhanayogākilesaṁ,

Nīvaraṇāni ca tīṇi malāni;

Tassa kilesapamocanahetuṁ,

Desayi suttavaraṁ dvipadaggo.

Nimmalasabbakilesapanūdaṁ,

Rāgavirāgamanejamasokaṁ;

Santapaṇītasududdasadhammaṁ,

Desayi suttavaraṁ dvipadaggo.

Rāgañca dosakamabhañjitasantaṁ,

Yonicatuggatipañcaviññāṇaṁ;

Taṇhāratacchadanatāṇalatāpamokkhaṁ,

Desayi suttavaraṁ dvipadaggo.

Gambhīraduddasasaṇhanipuṇaṁ,

Paṇḍitavedaniyaṁ nipuṇatthaṁ;

Lokavicāraṇañāṇapabhaggaṁ,

Desayi suttavaraṁ dvipadaggo.

Navaṅgakusumamālagīveyyaṁ,

Indriyajhānavimokkhavibhattaṁ;

Aṭṭhaṅgamaggadharaṁ varayānaṁ,

Desayi suttavaraṁ dvipadaggo.

Somupamaṁ vimalaṁ parisuddhaṁ,

Aṇṇavamūpamaratanasucittaṁ;

Pupphasamaṁ ravimūpamatejaṁ,

Desayi suttavaraṁ dvipadaggo.

Khemasivaṁ sukhasītalasantaṁ,

Maccutatāṇaparaṁ paramatthaṁ;

Tassa sunibbutadassanahetuṁ,

Desayi suttavaraṁ dvipadaggoti.

Suttanipātapāḷi samattā.