Paṭhamavagga

“Yāhu raṭṭhe samukkaṭṭho,

rañño aṅgassa paddhagū;

Svajja dhammesu ukkaṭṭho,

soṇo dukkhassa pāragū.

Pañca chinde pañca jahe,

pañca cuttari bhāvaye;

Pañca saṅgātigo bhikkhu,

oghatiṇṇoti vuccati.

Unnaḷassa pamattassa,

bāhirāsassa bhikkhuno;

Sīlaṁ samādhi paññā ca,

pāripūriṁ na gacchati.

Yañhi kiccaṁ apaviddhaṁ,

akiccaṁ pana karīyati;

Unnaḷānaṁ pamattānaṁ,

tesaṁ vaḍḍhanti āsavā.

Yesañca susamāraddhā,

niccaṁ kāyagatā sati;

Akiccaṁ te na sevanti,

kicce sātaccakārino;

Satānaṁ sampajānānaṁ,

atthaṁ gacchanti āsavā.

Ujumaggamhi akkhāte,

gacchatha mā nivattatha;

Attanā codayattānaṁ,

nibbānamabhihāraye.

Accāraddhamhi vīriyamhi,

satthā loke anuttaro;

Vīṇopamaṁ karitvā me,

dhammaṁ desesi cakkhumā;

Tassāhaṁ vacanaṁ sutvā,

vihāsiṁ sāsane rato.

Samathaṁ paṭipādesiṁ,

uttamatthassa pattiyā;

Tisso vijjā anuppattā,

kataṁ buddhassa sāsanaṁ.

Nekkhamme adhimuttassa,

pavivekañca cetaso;

Abyāpajjādhimuttassa,

upādānakkhayassa ca.

Taṇhakkhayādhimuttassa,

asammohañca cetaso;

Disvā āyatanuppādaṁ,

sammā cittaṁ vimuccati.

Tassa sammā vimuttassa,

santacittassa bhikkhuno;

Katassa paṭicayo natthi,

karaṇīyaṁ na vijjati.

Selo yathā ekagghano,

vātena na samīrati;

Evaṁ rūpā rasā saddā,

gandhā phassā ca kevalā.

Iṭṭhā dhammā aniṭṭhā ca,

nappavedhenti tādino;

Ṭhitaṁ cittaṁ visaññuttaṁ,

vayañcassānupassatī”ti.

… Soṇo koḷiviso thero …

Terasanipāto niṭṭhito.

Tatruddānaṁ

Soṇo koḷiviso thero,

ekoyeva mahiddhiko;

Terasamhi nipātamhi,

gāthāyo cettha terasāti.