Paṭhamavagga

“Upārambhacitto dummedho,

suṇāti jinasāsanaṁ;

Ārakā hoti saddhammā,

nabhaso pathavī yathā.

Upārambhacitto dummedho,

suṇāti jinasāsanaṁ;

Parihāyati saddhammā,

kāḷapakkheva candimā.

Upārambhacitto dummedho,

suṇāti jinasāsanaṁ;

Parisussati saddhamme,

maccho appodake yathā.

Upārambhacitto dummedho,

suṇāti jinasāsanaṁ;

Na virūhati saddhamme,

khette bījaṁva pūtikaṁ.

Yo ca tuṭṭhena cittena,

suṇāti jinasāsanaṁ;

Khepetvā āsave sabbe,

sacchikatvā akuppataṁ;

Pappuyya paramaṁ santiṁ,

parinibbātināsavo”ti.

… Yasadatto thero ….