Ghaṭīkārasutta

“Avihaṁ upapannāse,

vimuttā satta bhikkhavo;

Rāgadosaparikkhīṇā,

tiṇṇā loke visattikan”ti.

“Ke ca te ataruṁ paṅkaṁ,

maccudheyyaṁ suduttaraṁ;

Ke hitvā mānusaṁ dehaṁ,

dibbayogaṁ upaccagun”ti.

“Upako palagaṇḍo ca,

pukkusāti ca te tayo;

Bhaddiyo khaṇḍadevo ca,

bāhuraggi ca siṅgiyo;

Te hitvā mānusaṁ dehaṁ,

dibbayogaṁ upaccagun”ti.

“Kusalī bhāsasī tesaṁ,

mārapāsappahāyinaṁ;

Kassa te dhammamaññāya,

acchiduṁ bhavabandhanan”ti.

“Na aññatra bhagavatā,

nāññatra tava sāsanā;

Yassa te dhammamaññāya,

acchiduṁ bhavabandhanaṁ.

Yattha nāmañca rūpañca,

asesaṁ uparujjhati;

Taṁ te dhammaṁ idhaññāya,

acchiduṁ bhavabandhanan”ti.

“Gambhīraṁ bhāsasī vācaṁ,

dubbijānaṁ sudubbudhaṁ;

Kassa tvaṁ dhammamaññāya,

vācaṁ bhāsasi īdisan”ti.

“Kumbhakāro pure āsiṁ,

vekaḷiṅge ghaṭīkaro;

Mātāpettibharo āsiṁ,

kassapassa upāsako.

Virato methunā dhammā,

brahmacārī nirāmiso;

Ahuvā te sagāmeyyo,

ahuvā te pure sakhā.

Sohamete pajānāmi,

vimutte satta bhikkhavo;

Rāgadosaparikkhīṇe,

tiṇṇe loke visattikan”ti.

“Evametaṁ tadā āsi,

yathā bhāsasi bhaggava;

Kumbhakāro pure āsi,

vekaḷiṅge ghaṭīkaro;

Mātāpettibharo āsi,

kassapassa upāsako.

Virato methunā dhammā,

brahmacārī nirāmiso;

Ahuvā me sagāmeyyo,

ahuvā me pure sakhā”ti.

“Evametaṁ purāṇānaṁ,

sahāyānaṁ ahu saṅgamo;

Ubhinnaṁ bhāvitattānaṁ,

sarīrantimadhārinan”ti.

Ādittavaggo pañcamo.

Tassuddānaṁ

Ādittaṁ kiṁdadaṁ annaṁ,

ekamūlaanomiyaṁ;

Accharāvanaropajetaṁ,

maccharena ghaṭīkaroti.