Sakkanāmasutta

Sāvatthiyaṁ jetavane.

Tatra kho bhagavā bhikkhū etadavoca:

“sakko, bhikkhave, devānamindo pubbe manussabhūto samāno magho nāma māṇavo ahosi, tasmā maghavāti vuccati.

Sakko, bhikkhave, devānamindo pubbe manussabhūto samāno pure dānaṁ adāsi, tasmā purindadoti vuccati.

Sakko, bhikkhave, devānamindo pubbe manussabhūto samāno sakkaccaṁ dānaṁ adāsi, tasmā sakkoti vuccati.

Sakko, bhikkhave, devānamindo pubbe manussabhūto samāno āvasathaṁ adāsi, tasmā vāsavoti vuccati.

Sakko, bhikkhave, devānamindo sahassampi atthānaṁ muhuttena cinteti, tasmā sahassakkhoti vuccati.

Sakkassa, bhikkhave, devānamindassa sujā nāma asurakaññā pajāpati, tasmā sujampatīti vuccati.

Sakko, bhikkhave, devānamindo devānaṁ tāvatiṁsānaṁ issariyādhipaccaṁ rajjaṁ kāreti, tasmā devānamindoti vuccati.

Sakkassa, bhikkhave, devānamindassa pubbe manussabhūtassa satta vatapadāni samattāni samādinnāni ahesuṁ, yesaṁ samādinnattā sakko sakkattaṁ ajjhagā.

Katamāni satta vatapadāni?

Yāvajīvaṁ mātāpettibharo assaṁ,

yāvajīvaṁ kule jeṭṭhāpacāyī assaṁ,

yāvajīvaṁ saṇhavāco assaṁ,

yāvajīvaṁ apisuṇavāco assaṁ,

yāvajīvaṁ vigatamalamaccherena cetasā agāraṁ ajjhāvaseyyaṁ muttacāgo payatapāṇi vossaggarato yācayogo dānasaṁvibhāgarato,

yāvajīvaṁ saccavāco assaṁ,

yāvajīvaṁ akkodhano assaṁ—sacepi me kodho uppajjeyya, khippameva naṁ paṭivineyyanti.

Sakkassa, bhikkhave, devānamindassa pubbe manussabhūtassa imāni satta vatapadāni samattāni samādinnāni ahesuṁ, yesaṁ samādinnattā sakko sakkattaṁ ajjhagāti.

Mātāpettibharaṁ jantuṁ,

kule jeṭṭhāpacāyinaṁ;

Saṇhaṁ sakhilasambhāsaṁ,

pesuṇeyyappahāyinaṁ.

Maccheravinaye yuttaṁ,

saccaṁ kodhābhibhuṁ naraṁ;

Taṁ ve devā tāvatiṁsā,

āhu sappuriso itī”ti.