Kulūpakasutta
Sāvatthiyaṁ viharati.
“Taṁ kiṁ maññatha, bhikkhave,
kathaṁrūpo bhikkhu arahati kulūpako hotuṁ, kathaṁrūpo bhikkhu na arahati kulūpako hotun”ti?
Bhagavaṁmūlakā no, bhante, dhammā …pe…
bhagavā etadavoca:
“Yo hi koci, bhikkhave, bhikkhu evaṁcitto kulāni upasaṅkamati:
‘dentuyeva me, mā nādaṁsu;
bahukaññeva me dentu, mā thokaṁ;
paṇītaññeva me dentu, mā lūkhaṁ;
sīghaññeva me dentu, mā dandhaṁ;
sakkaccaññeva me dentu, mā asakkaccan’ti.
Tassa ce, bhikkhave, bhikkhuno evaṁcittassa kulāni upasaṅkamato na denti, tena bhikkhu sandīyati; so tatonidānaṁ dukkhaṁ domanassaṁ paṭisaṁvedayati.
Thokaṁ denti, no bahukaṁ …pe…
lūkhaṁ denti, no paṇītaṁ …
dandhaṁ denti, no sīghaṁ, tena bhikkhu sandīyati; so tatonidānaṁ dukkhaṁ domanassaṁ paṭisaṁvedayati.
Asakkaccaṁ denti, no sakkaccaṁ; tena bhikkhu sandīyati; so tatonidānaṁ dukkhaṁ domanassaṁ paṭisaṁvedayati.
Evarūpo kho, bhikkhave, bhikkhu na arahati kulūpako hotuṁ.
Yo ca kho, bhikkhave, bhikkhu evaṁcitto kulāni upasaṅkamati:
‘taṁ kutettha labbhā parakulesu—
dentuyeva me, mā nādaṁsu;
bahukaññeva me dentu, mā thokaṁ;
paṇītaññeva me dentu, mā lūkhaṁ;
sīghaññeva me dentu, mā dandhaṁ;
sakkaccaññeva me dentu, mā asakkaccan’ti.
Tassa ce, bhikkhave, bhikkhuno evaṁcittassa kulāni upasaṅkamato na denti; tena bhikkhu na sandīyati; so na tatonidānaṁ dukkhaṁ domanassaṁ paṭisaṁvedayati.
Thokaṁ denti, no bahukaṁ; tena bhikkhu na sandīyati; so na tatonidānaṁ dukkhaṁ domanassaṁ paṭisaṁvedayati.
Lūkhaṁ denti, no paṇītaṁ; tena bhikkhu na sandīyati; so na tatonidānaṁ dukkhaṁ domanassaṁ paṭisaṁvedayati.
Dandhaṁ denti, no sīghaṁ; tena bhikkhu na sandīyati; so na tatonidānaṁ dukkhaṁ domanassaṁ paṭisaṁvedayati.
Asakkaccaṁ denti, no sakkaccaṁ; tena bhikkhu na sandīyati; so na tatonidānaṁ dukkhaṁ domanassaṁ paṭisaṁvedayati.
Evarūpo kho, bhikkhave, bhikkhu arahati kulūpako hotuṁ.
Kassapo, bhikkhave, evaṁcitto kulāni upasaṅkamati:
‘taṁ kutettha labbhā parakulesu—
dentuyeva me, mā nādaṁsu;
bahukaññeva me dentu, mā thokaṁ;
paṇītaññeva me dentu, mā lūkhaṁ;
sīghaññeva me dentu, mā dandhaṁ;
sakkaccaññeva me dentu, mā asakkaccan’ti.
Tassa ce, bhikkhave, kassapassa evaṁcittassa kulāni upasaṅkamato na denti; tena kassapo na sandīyati; so na tatonidānaṁ dukkhaṁ domanassaṁ paṭisaṁvedayati.
Thokaṁ denti, no bahukaṁ; tena kassapo na sandīyati; so na tatonidānaṁ dukkhaṁ domanassaṁ paṭisaṁvedayati.
Lūkhaṁ denti, no paṇītaṁ; tena kassapo na sandīyati; so na tatonidānaṁ dukkhaṁ domanassaṁ paṭisaṁvedayati.
Dandhaṁ denti, no sīghaṁ; tena kassapo na sandīyati; so na tatonidānaṁ dukkhaṁ domanassaṁ paṭisaṁvedayati.
Asakkaccaṁ denti, no sakkaccaṁ; tena kassapo na sandīyati; so na tatonidānaṁ dukkhaṁ domanassaṁ paṭisaṁvedayati.
Kassapena vā hi vo, bhikkhave, ovadissāmi yo vā panassa kassapasadiso. Ovaditehi ca pana vo tathattāya paṭipajjitabban”ti.
Catutthaṁ.
