Paṭhamadvayasutta
“Dvayaṁ vo, bhikkhave, desessāmi.
Taṁ suṇātha.
Kiñca, bhikkhave, dvayaṁ?
Cakkhuñceva rūpā ca, sotañceva saddā ca, ghānañceva gandhā ca, jivhā ceva rasā ca, kāyo ceva phoṭṭhabbā ca, mano ceva dhammā ca—
idaṁ vuccati, bhikkhave, dvayaṁ.
Yo, bhikkhave, evaṁ vadeyya:
‘ahametaṁ dvayaṁ paccakkhāya aññaṁ dvayaṁ paññapessāmī’ti, tassa vācāvatthukamevassa.
Puṭṭho ca na sampāyeyya.
Uttariñca vighātaṁ āpajjeyya.
Taṁ kissa hetu?
Yathā taṁ, bhikkhave, avisayasmin”ti.
Navamaṁ.
