Kutūhalasālāsutta
Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vacchagotto paribbājako bhagavantaṁ etadavoca:
“Purimāni, bho gotama, divasāni purimatarāni sambahulānaṁ nānātitthiyānaṁ samaṇabrāhmaṇānaṁ paribbājakānaṁ kutūhalasālāyaṁ sannisinnānaṁ sannipatitānaṁ ayamantarākathā udapādi:
‘ayaṁ kho pūraṇo kassapo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa.
Sopi sāvakaṁ abbhatītaṁ kālaṅkataṁ upapattīsu byākaroti:
“asu amutra upapanno, asu amutra upapanno”ti.
Yopissa sāvako uttamapuriso paramapuriso paramapattipatto tampi sāvakaṁ abbhatītaṁ kālaṅkataṁ upapattīsu byākaroti:
“asu amutra upapanno, asu amutra upapanno”ti.
Ayampi kho makkhali gosālo …pe…
ayampi kho nigaṇṭho nāṭaputto …pe…
ayampi kho sañcayo belaṭṭhaputto …pe…
ayampi kho pakudho kaccāno …pe…
ayampi kho ajito kesakambalo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa.
Sopi sāvakaṁ abbhatītaṁ kālaṅkataṁ upapattīsu byākaroti:
“asu amutra upapanno, asu amutra upapanno”ti.
Yopissa sāvako uttamapuriso paramapuriso paramapattipatto tampi sāvakaṁ abbhatītaṁ kālaṅkataṁ upapattīsu byākaroti:
“asu amutra upapanno, asu amutra upapanno”ti.
Ayampi kho samaṇo gotamo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa.
Sopi sāvakaṁ abbhatītaṁ kālaṅkataṁ upapattīsu byākaroti:
“asu amutra upapanno, asu amutra upapanno”ti.
Yopissa sāvako uttamapuriso paramapuriso paramapattipatto tañca sāvakaṁ abbhatītaṁ kālaṅkataṁ upapattīsu na byākaroti:
“asu amutra upapanno, asu amutra upapanno”ti.
Api ca kho naṁ evaṁ byākaroti:
“acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā”’ti.
Tassa mayhaṁ, bho gotama, ahu deva kaṅkhā, ahu vicikicchā:
‘kathaṁ nāma samaṇassa gotamassa dhammo abhiññeyyo’”ti?
“Alañhi te, vaccha, kaṅkhituṁ, alaṁ vicikicchituṁ.
Kaṅkhanīye ca pana te ṭhāne vicikicchā uppannā.
Saupādānassa khvāhaṁ, vaccha, upapattiṁ paññāpemi no anupādānassa.
Seyyathāpi, vaccha, aggi saupādāno jalati, no anupādāno;
evameva khvāhaṁ, vaccha, saupādānassa upapattiṁ paññāpemi, no anupādānassā”ti.
“Yasmiṁ, bho gotama, samaye acci vātena khittā dūrampi gacchati, imassa pana bhavaṁ gotamo kiṁ upādānasmiṁ paññāpetī”ti?
“Yasmiṁ kho, vaccha, samaye acci vātena khittā dūrampi gacchati, tamahaṁ vātūpādānaṁ paññāpemi.
Vāto hissa, vaccha, tasmiṁ samaye upādānaṁ hotī”ti.
“Yasmiñca pana, bho gotama, samaye imañca kāyaṁ nikkhipati, satto ca aññataraṁ kāyaṁ anupapanno hoti, imassa pana bhavaṁ gotamo kiṁ upādānasmiṁ paññāpetī”ti?
“Yasmiṁ kho, vaccha, samaye imañca kāyaṁ nikkhipati, satto ca aññataraṁ kāyaṁ anupapanno hoti, tamahaṁ taṇhūpādānaṁ vadāmi.
Taṇhā hissa, vaccha, tasmiṁ samaye upādānaṁ hotī”ti.
Navamaṁ.
