Brāhmaṇapaccorohaṇīsutta

Tena kho pana samayena jāṇussoṇi brāhmaṇo tadahuposathe sīsaṁnhāto navaṁ khomayugaṁ nivattho allakusamuṭṭhiṁ ādāya bhagavato avidūre ekamantaṁ ṭhito hoti.

Addasā kho bhagavā jāṇussoṇiṁ brāhmaṇaṁ tadahuposathe sīsaṁnhātaṁ navaṁ khomayugaṁ nivatthaṁ allakusamuṭṭhiṁ ādāya ekamantaṁ ṭhitaṁ.

Disvāna jāṇussoṇiṁ brāhmaṇaṁ etadavoca:

“kiṁ nu tvaṁ, brāhmaṇa, tadahuposathe sīsaṁnhāto navaṁ khomayugaṁ nivattho allakusamuṭṭhiṁ ādāya ekamantaṁ ṭhito?

Kiṁ nvajja brāhmaṇakulassā”ti?

“Paccorohaṇī, bho gotama, ajja brāhmaṇakulassā”ti.

“Yathā kathaṁ pana, brāhmaṇa, brāhmaṇānaṁ paccorohaṇī hotī”ti?

“Idha, bho gotama, brāhmaṇā tadahuposathe sīsaṁnhātā navaṁ khomayugaṁ nivatthā allena gomayena pathaviṁ opuñjitvā haritehi kusehi pattharitvā antarā ca velaṁ antarā ca agyāgāraṁ seyyaṁ kappenti.

Te taṁ rattiṁ tikkhattuṁ paccuṭṭhāya pañjalikā aggiṁ namassanti:

‘paccorohāma bhavantaṁ, paccorohāma bhavantan’ti.

Bahukena ca sappitelanavanītena aggiṁ santappenti.

Tassā ca rattiyā accayena paṇītena khādanīyena bhojanīyena brāhmaṇe santappenti.

Evaṁ, bho gotama, brāhmaṇānaṁ paccorohaṇī hotī”ti.

“Aññathā kho, brāhmaṇa, brāhmaṇānaṁ paccorohaṇī hoti, aññathā ca pana ariyassa vinaye paccorohaṇī hotī”ti.

“Yathā kathaṁ pana, bho gotama, ariyassa vinaye paccorohaṇī hoti?

Sādhu me bhavaṁ gotamo tathā dhammaṁ desetu yathā ariyassa vinaye paccorohaṇī hotī”ti.

“Tena hi, brāhmaṇa, suṇāhi, sādhukaṁ manasi karohi; bhāsissāmī”ti.

“Evaṁ, bho”ti kho jāṇussoṇi brāhmaṇo bhagavato paccassosi.

Bhagavā etadavoca:

“Idha, brāhmaṇa, ariyasāvako iti paṭisañcikkhati:

‘pāṇātipātassa kho pāpako vipāko diṭṭhe ceva dhamme abhisamparāyañcā’ti.

So iti paṭisaṅkhāya pāṇātipātaṁ pajahati;

pāṇātipātā paccorohati.

… ‘Adinnādānassa kho pāpako vipāko—

diṭṭhe ceva dhamme abhisamparāyañcā’ti.

So iti paṭisaṅkhāya adinnādānaṁ pajahati;

adinnādānā paccorohati.

… ‘Kāmesumicchācārassa kho pāpako vipāko—

diṭṭhe ceva dhamme abhisamparāyañcā’ti.

So iti paṭisaṅkhāya kāmesumicchācāraṁ pajahati;

kāmesumicchācārā paccorohati.

… ‘Musāvādassa kho pāpako vipāko—

diṭṭhe ceva dhamme abhisamparāyañcā’ti.

So iti paṭisaṅkhāya musāvādaṁ pajahati;

musāvādā paccorohati.

… ‘Pisuṇāya vācāya kho pāpako vipāko—

diṭṭhe ceva dhamme abhisamparāyañcā’ti.

So iti paṭisaṅkhāya pisuṇaṁ vācaṁ pajahati;

pisuṇāya vācāya paccorohati.

… ‘Pharusāya vācāya kho pāpako vipāko—

diṭṭhe ceva dhamme abhisamparāyañcā’ti.

So iti paṭisaṅkhāya pharusaṁ vācaṁ pajahati;

pharusāya vācāya paccorohati.

… ‘Samphappalāpassa kho pāpako vipāko—

diṭṭhe ceva dhamme abhisamparāyañcā’ti.

So iti paṭisaṅkhāya samphappalāpaṁ pajahati;

samphappalāpā paccorohati.

… ‘Abhijjhāya kho pāpako vipāko—

diṭṭhe ceva dhamme abhisamparāyañcā’ti.

So iti paṭisaṅkhāya abhijjhaṁ pajahati;

abhijjhāya paccorohati.

… ‘Byāpādassa kho pāpako vipāko—

diṭṭhe ceva dhamme abhisamparāyañcā’ti.

So iti paṭisaṅkhāya byāpādaṁ pajahati;

byāpādā paccorohati.

… ‘Micchādiṭṭhiyā kho pāpako vipāko—

diṭṭhe ceva dhamme abhisamparāyañcā’ti.

So iti paṭisaṅkhāya micchādiṭṭhiṁ pajahati;

micchādiṭṭhiyā paccorohati.

Evaṁ kho, brāhmaṇa, ariyassa vinaye paccorohaṇī hotī”ti.

“Aññathā kho, bho gotama, brāhmaṇānaṁ paccorohaṇī hoti, aññathā ca pana ariyassa vinaye paccorohaṇī hoti.

Imissā, bho gotama, ariyassa vinaye paccorohaṇiyā brāhmaṇānaṁ paccorohaṇī kalaṁ nāgghati soḷasiṁ.

Abhikkantaṁ, bho gotama …pe…

upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

Paṭhamaṁ.