Rājantepurappavesanasutta
“Dasayime, bhikkhave, ādīnavā rājantepurappavesane.
Katame dasa?
Idha, bhikkhave, rājā mahesiyā saddhiṁ nisinno hoti.
Tatra bhikkhu pavisati.
Mahesī vā bhikkhuṁ disvā sitaṁ pātukaroti, bhikkhu vā mahesiṁ disvā sitaṁ pātukaroti.
Tattha rañño evaṁ hoti:
‘addhā imesaṁ kataṁ vā karissanti vā’ti.
Ayaṁ, bhikkhave, paṭhamo ādīnavo rājantepurappavesane.
Puna caparaṁ, bhikkhave, rājā bahukicco bahukaraṇīyo aññataraṁ itthiṁ gantvā na sarati:
‘sā tena gabbhaṁ gaṇhāti’.
Tattha rañño evaṁ hoti:
‘na kho idha añño koci pavisati, aññatra pabbajitena.
Siyā nu kho pabbajitassa kamman’ti.
Ayaṁ, bhikkhave, dutiyo ādīnavo rājantepurappavesane.
Puna caparaṁ, bhikkhave, rañño antepure aññataraṁ ratanaṁ nassati.
Tattha rañño evaṁ hoti:
‘na kho idha añño koci pavisati, aññatra pabbajitena.
Siyā nu kho pabbajitassa kamman’ti.
Ayaṁ, bhikkhave, tatiyo ādīnavo rājantepurappavesane.
Puna caparaṁ, bhikkhave, rañño antepure abbhantarā guyhamantā bahiddhā sambhedaṁ gacchanti.
Tattha rañño evaṁ hoti:
‘na kho idha añño koci pavisati, aññatra pabbajitena.
Siyā nu kho pabbajitassa kamman’ti.
Ayaṁ, bhikkhave, catuttho ādīnavo rājantepurappavesane.
Puna caparaṁ, bhikkhave, rañño antepure pitā vā puttaṁ pattheti putto vā pitaraṁ pattheti.
Tesaṁ evaṁ hoti:
‘na kho idha añño koci pavisati, aññatra pabbajitena.
Siyā nu kho pabbajitassa kamman’ti.
Ayaṁ, bhikkhave, pañcamo ādīnavo rājantepurappavesane.
Puna caparaṁ, bhikkhave, rājā nīcaṭṭhāniyaṁ ucce ṭhāne ṭhapeti.
Yesaṁ taṁ amanāpaṁ tesaṁ evaṁ hoti:
‘rājā kho pabbajitena saṁsaṭṭho.
Siyā nu kho pabbajitassa kamman’ti.
Ayaṁ, bhikkhave, chaṭṭho ādīnavo rājantepurappavesane.
Puna caparaṁ, bhikkhave, rājā uccaṭṭhāniyaṁ nīce ṭhāne ṭhapeti.
Yesaṁ taṁ amanāpaṁ tesaṁ evaṁ hoti:
‘rājā kho pabbajitena saṁsaṭṭho.
Siyā nu kho pabbajitassa kamman’ti.
Ayaṁ, bhikkhave, sattamo ādīnavo rājantepurappavesane.
Puna caparaṁ, bhikkhave, rājā akāle senaṁ uyyojeti.
Yesaṁ taṁ amanāpaṁ tesaṁ evaṁ hoti:
‘rājā kho pabbajitena saṁsaṭṭho.
Siyā nu kho pabbajitassa kamman’ti.
Ayaṁ, bhikkhave, aṭṭhamo ādīnavo rājantepurappavesane.
Puna caparaṁ, bhikkhave, rājā kāle senaṁ uyyojetvā antarāmaggato nivattāpeti.
Yesaṁ taṁ amanāpaṁ tesaṁ evaṁ hoti:
‘rājā kho pabbajitena saṁsaṭṭho.
Siyā nu kho pabbajitassa kamman’ti.
Ayaṁ, bhikkhave, navamo ādīnavo rājantepurappavesane.
Puna caparaṁ, bhikkhave, rañño antepuraṁ hatthisammaddaṁ assasammaddaṁ rathasammaddaṁ rajanīyāni rūpasaddagandharasaphoṭṭhabbāni, yāni na pabbajitassa sāruppāni.
Ayaṁ, bhikkhave, dasamo ādīnavo rājantepurappavesane.
Ime kho, bhikkhave, dasa ādīnavā rājantepurappavesane”ti.
Pañcamaṁ.
