Kimatthiyasutta

Evaṁ me sutaṁ—

ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:

“kimatthiyāni, bhante, kusalāni sīlāni kimānisaṁsānī”ti?

“Avippaṭisāratthāni kho, ānanda, kusalāni sīlāni avippaṭisārānisaṁsānī”ti.

“Avippaṭisāro pana, bhante, kimatthiyo kimānisaṁso”?

“Avippaṭisāro kho, ānanda, pāmojjattho pāmojjānisaṁso”.

“Pāmojjaṁ pana, bhante, kimatthiyaṁ kimānisaṁsaṁ”?

“Pāmojjaṁ kho, ānanda, pītatthaṁ pītānisaṁsaṁ”.

“Pīti pana, bhante, kimatthiyā kimānisaṁsā”?

“Pīti kho, ānanda, passaddhatthā passaddhānisaṁsā”.

“Passaddhi pana, bhante, kimatthiyā kimānisaṁsā”?

“Passaddhi kho, ānanda, sukhatthā sukhānisaṁsā”.

“Sukhaṁ pana, bhante, kimatthiyaṁ kimānisaṁsaṁ”?

“Sukhaṁ kho, ānanda, samādhatthaṁ samādhānisaṁsaṁ”.

“Samādhi pana, bhante, kimatthiyo kimānisaṁso”?

“Samādhi kho, ānanda, yathābhūtañāṇadassanattho yathābhūtañāṇadassanānisaṁso”.

“Yathābhūtañāṇadassanaṁ pana, bhante, kimatthiyaṁ kimānisaṁsaṁ”?

“Yathābhūtañāṇadassanaṁ kho, ānanda, nibbidatthaṁ nibbidānisaṁsaṁ”.

“Nibbidā pana, bhante, kimatthiyā kimānisaṁsā”?

“Nibbidā kho, ānanda, virāgatthā virāgānisaṁsā”.

“Virāgo pana, bhante, kimatthiyo kimānisaṁso”?

“Virāgo kho, ānanda, vimuttiñāṇadassanattho vimuttiñāṇadassanānisaṁso.

Iti kho, ānanda, kusalāni sīlāni avippaṭisāratthāni avippaṭisārānisaṁsāni,

avippaṭisāro pāmojjattho pāmojjānisaṁso,

pāmojjaṁ pītatthaṁ pītānisaṁsaṁ,

pīti passaddhatthā passaddhānisaṁsā,

passaddhi sukhatthā sukhānisaṁsā,

sukhaṁ samādhatthaṁ samādhānisaṁsaṁ,

samādhi yathābhūtañāṇadassanattho yathābhūtañāṇadassanānisaṁso,

yathābhūtañāṇadassanaṁ nibbidatthaṁ nibbidānisaṁsaṁ,

nibbidā virāgatthā virāgānisaṁsā,

virāgo vimuttiñāṇadassanattho vimuttiñāṇadassanānisaṁso.

Iti kho, ānanda, kusalāni sīlāni anupubbena aggāya parentī”ti.

Paṭhamaṁ.