Lekhasutta

“Tayome, bhikkhave, puggalā santo saṁvijjamānā lokasmiṁ.

Katame tayo?

Pāsāṇalekhūpamo puggalo, pathavilekhūpamo puggalo, udakalekhūpamo puggalo.

Katamo ca, bhikkhave, pāsāṇalekhūpamo puggalo?

Idha, bhikkhave, ekacco puggalo abhiṇhaṁ kujjhati.

So ca khvassa kodho dīgharattaṁ anuseti.

Seyyathāpi, bhikkhave, pāsāṇe lekhā na khippaṁ lujjati vātena vā udakena vā, ciraṭṭhitikā hoti;

evamevaṁ kho, bhikkhave, idhekacco puggalo abhiṇhaṁ kujjhati.

So ca khvassa kodho dīgharattaṁ anuseti.

Ayaṁ vuccati, bhikkhave, pāsāṇalekhūpamo puggalo.

Katamo ca, bhikkhave, pathavilekhūpamo puggalo?

Idha, bhikkhave, ekacco puggalo abhiṇhaṁ kujjhati.

So ca khvassa kodho na dīgharattaṁ anuseti.

Seyyathāpi, bhikkhave, pathaviyā lekhā khippaṁ lujjati vātena vā udakena vā, na ciraṭṭhitikā hoti;

evamevaṁ kho, bhikkhave, idhekacco puggalo abhiṇhaṁ kujjhati.

So ca khvassa kodho na dīgharattaṁ anuseti.

Ayaṁ vuccati, bhikkhave, pathavilekhūpamo puggalo.

Katamo ca, bhikkhave, udakalekhūpamo puggalo?

Idha, bhikkhave, ekacco puggalo āgāḷhenapi vuccamāno pharusenapi vuccamāno amanāpenapi vuccamāno sandhiyatimeva saṁsandatimeva sammodatimeva.

Seyyathāpi, bhikkhave, udake lekhā khippaṁyeva paṭivigacchati, na ciraṭṭhitikā hoti;

evamevaṁ kho, bhikkhave, idhekacco puggalo āgāḷhenapi vuccamāno pharusenapi vuccamāno amanāpenapi vuccamāno sandhiyatimeva saṁsandatimeva sammodatimeva.

Ayaṁ vuccati, bhikkhave, udakalekhūpamo puggalo.

Ime kho, bhikkhave, tayo puggalā santo saṁvijjamānā lokasmin”ti.

Dasamaṁ.

Kusināravaggo tatiyo.

Tassuddānaṁ

Kusinārabhaṇḍanā ceva,

Gotamabharaṇḍuhatthako;

Kaṭuviyaṁ dve anuruddhā,

Paṭicchannaṁ lekhena te dasāti.