Rāgasutta

“Tayome, bhikkhave, dhammā.

Katame tayo?

Rāgo, doso, moho.

Ime kho, bhikkhave, tayo dhammā.

Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.

Katame tayo?

Rāgassa pahānāya asubhā bhāvetabbā, dosassa pahānāya mettā bhāvetabbā, mohassa pahānāya paññā bhāvetabbā.

Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.

Paṭhamaṁ.