Sīlapāramī 8

kn / cp
Cariyāpiṭaka · Hatthināgavagga

“Punāparaṁ yadā homi,

mahāpakkho mahiddhiko;

Dhammo nāma mahāyakkho,

sabbalokānukampako.

Dasakusalakammapathe,

samādapento mahājanaṁ;

Carāmi gāmanigamaṁ,

samitto saparijjano.

Pāpo kadariyo yakkho,

dīpento dasa pāpake;

Sopettha mahiyā carati,

samitto saparijjano.

Dhammavādī adhammo ca,

ubho paccanikā mayaṁ;

Dhure dhuraṁ ghaṭṭayantā,

samimhā paṭipathe ubho.

Kalaho vattatī bhesmā,

kalyāṇapāpakassa ca;

Maggā okkamanatthāya,

mahāyuddho upaṭṭhito.

Yadihaṁ tassa kuppeyyaṁ,

yadi bhinde tapoguṇaṁ;

Sahaparijanaṁ tassa,

rajabhūtaṁ kareyyahaṁ.

Api cāhaṁ sīlarakkhāya,

nibbāpetvāna mānasaṁ;

Saha janenokkamitvā,

pathaṁ pāpassa dāsahaṁ.

Saha pathato okkante,

katvā cittassa nibbutiṁ;

Vivaraṁ adāsi pathavī,

pāpayakkhassa tāvade”ti.

Dhammadevaputtacariyaṁ aṭṭhamaṁ.

← Предыдущая сутта Следующая сутта →