Lokavagga

Hīnaṁ dhammaṁ na seveyya,

pamādena na saṁvase;

Micchādiṭṭhiṁ na seveyya,

na siyā lokavaḍḍhano.

Uttiṭṭhe nappamajjeyya,

dhammaṁ sucaritaṁ care;

Dhammacārī sukhaṁ seti,

asmiṁ loke paramhi ca.

Dhammaṁ care sucaritaṁ,

na naṁ duccaritaṁ care;

Dhammacārī sukhaṁ seti,

asmiṁ loke paramhi ca.

Yathā pubbuḷakaṁ passe,

yathā passe marīcikaṁ;

Evaṁ lokaṁ avekkhantaṁ,

maccurājā na passati.

Etha passathimaṁ lokaṁ,

cittaṁ rājarathūpamaṁ;

Yattha bālā visīdanti,

natthi saṅgo vijānataṁ.

Yo ca pubbe pamajjitvā,

pacchā so nappamajjati;

Somaṁ lokaṁ pabhāseti,

abbhā muttova candimā.

Yassa pāpaṁ kataṁ kammaṁ,

kusalena pidhīyati;

Somaṁ lokaṁ pabhāseti,

abbhā muttova candimā.

Andhabhūto ayaṁ loko,

tanukettha vipassati;

Sakuṇo jālamuttova,

appo saggāya gacchati.

Haṁsādiccapathe yanti,

ākāse yanti iddhiyā;

Nīyanti dhīrā lokamhā,

jetvā māraṁ savāhiniṁ.

Ekaṁ dhammaṁ atītassa,

musāvādissa jantuno;

Vitiṇṇaparalokassa,

natthi pāpaṁ akāriyaṁ.

Na ve kadariyā devalokaṁ vajanti,

Bālā have nappasaṁsanti dānaṁ;

Dhīro ca dānaṁ anumodamāno,

Teneva so hoti sukhī parattha.

Pathabyā ekarajjena,

saggassa gamanena vā;

Sabbalokādhipaccena,

sotāpattiphalaṁ varaṁ.

Lokavaggo terasamo.