Pañcamavagga

Vuttañhetaṁ bhagavatā vuttamarahatāti me sutaṁ:

“Tayome, bhikkhave, aggappasādā.

Katame tayo?

Yāvatā, bhikkhave, sattā apadā vā dvipadā vā catuppadā vā bahuppadā vā rūpino vā arūpino vā saññino vā asaññino vā nevasaññināsaññino vā, tathāgato tesaṁ aggamakkhāyati arahaṁ sammāsambuddho.

Ye, bhikkhave, buddhe pasannā, agge te pasannā.

Agge kho pana pasannānaṁ aggo vipāko hoti.

Yāvatā, bhikkhave, dhammā saṅkhatā vā asaṅkhatā vā, virāgo tesaṁ aggamakkhāyati, yadidaṁ madanimmadano pipāsavinayo ālayasamugghāto vaṭṭupacchedo taṇhakkhayo virāgo nirodho nibbānaṁ.

Ye, bhikkhave, virāge dhamme pasannā, agge te pasannā.

Agge kho pana pasannānaṁ aggo vipāko hoti.

Yāvatā, bhikkhave, saṅghā vā gaṇā vā, tathāgatasāvakasaṅgho tesaṁ aggamakkhāyati, yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.

Ye, bhikkhave, saṅghe pasannā, agge te pasannā.

Agge kho pana pasannānaṁ aggo vipāko hoti.

Ime kho, bhikkhave, tayo aggappasādā”ti.

Etamatthaṁ bhagavā avoca.

Tatthetaṁ iti vuccati:

“Aggato ve pasannānaṁ,

aggaṁ dhammaṁ vijānataṁ;

Agge buddhe pasannānaṁ,

dakkhiṇeyye anuttare.

Agge dhamme pasannānaṁ,

virāgūpasame sukhe;

Agge saṅghe pasannānaṁ,

puññakkhette anuttare.

Aggasmiṁ dānaṁ dadataṁ,

aggaṁ puññaṁ pavaḍḍhati;

Aggaṁ āyu ca vaṇṇo ca,

yaso kitti sukhaṁ balaṁ.

Aggassa dātā medhāvī,

aggadhammasamāhito;

Devabhūto manusso vā,

aggappatto pamodatī”ti.

Ayampi attho vutto bhagavatā, iti me sutanti.

Paṭhamaṁ.