Brāhmaṇadhammayāgavagga

kn / iti / vagga11
Itivuttaka 105 · Catukkanipāta

Vuttañhetaṁ bhagavatā vuttamarahatāti me sutaṁ:

“Cattārome, bhikkhave, taṇhuppādā, yattha bhikkhuno taṇhā uppajjamānā uppajjati.

Katame cattāro?

Cīvarahetu vā, bhikkhave, bhikkhuno taṇhā uppajjamānā uppajjati;

piṇḍapātahetu vā, bhikkhave, bhikkhuno taṇhā uppajjamānā uppajjati;

senāsanahetu vā, bhikkhave, bhikkhuno taṇhā uppajjamānā uppajjati;

itibhavābhavahetu vā, bhikkhave, bhikkhuno taṇhā uppajjamānā uppajjati.

Ime kho, bhikkhave, cattāro taṇhuppādā yattha bhikkhuno taṇhā uppajjamānā uppajjatī”ti.

Etamatthaṁ bhagavā avoca.

Tatthetaṁ iti vuccati:

“Taṇhādutiyo puriso,

dīghamaddhāna saṁsaraṁ;

Itthabhāvaññathābhāvaṁ,

saṁsaraṁ nātivattati.

Etamādīnavaṁ ñatvā,

taṇhaṁ dukkhassa sambhavaṁ;

Vītataṇho anādāno,

sato bhikkhu paribbaje”ti.

Ayampi attho vutto bhagavatā, iti me sutanti.

Chaṭṭhaṁ.

← Предыдущая сутта Следующая сутта →