Tatiyavagga

Vuttañhetaṁ bhagavatā vuttamarahatāti me sutaṁ:

“Ekadhammaṁ atītassa, bhikkhave, purisapuggalassa nāhaṁ tassa kiñci pāpakammaṁ akaraṇīyanti vadāmi.

Katamaṁ ekadhammaṁ?

Yadidaṁ, bhikkhave, sampajānamusāvādo”ti.

Etamatthaṁ bhagavā avoca.

Tatthetaṁ iti vuccati:

“Ekadhammaṁ atītassa,

musāvādissa jantuno;

Vitiṇṇaparalokassa,

natthi pāpaṁ akāriyan”ti.

Ayampi attho vutto bhagavatā, iti me sutanti.

Pañcamaṁ.