3. Pañcāyatanakammanibbattapañha

kn / mil
Milindapañha · Nibbānavagga

Rājā āha—

“bhante nāgasena, yānimāni pañcāyatanāni, kiṁ nu tāni nānākammehi nibbattāni, udāhu ekena kammenā”ti?

“Nānākammehi, mahārāja, nibbattāni, na ekena kammenā”ti.

“Opammaṁ karohī”ti.

“Taṁ kiṁ maññasi, mahārāja, ekasmiṁ khette nānābījāni vappeyyuṁ, tesaṁ nānābījānaṁ nānāphalāni nibbatteyyun”ti?

“Āma, bhante, nibbatteyyun”ti.

“Evameva kho, mahārāja, yāni yāni pañcāyatanāni, tāni tāni nānākammehi nibbattāni, na ekena kammenā”ti.

“Kallosi, bhante nāgasenā”ti.

Pañcāyatanakammanibbattapañho tatiyo.

← Предыдущая сутта Следующая сутта →