10. Cirakatasaraṇapañha

kn / mil
Milindapañha · Sativagga

Rājā āha—

“bhante nāgasena, kena atītaṁ cirakataṁ saratī”ti?

“Satiyā, mahārājā”ti.

“Nanu, bhante nāgasena, cittena sarati no satiyā”ti?

“Abhijānāsi nu tvaṁ, mahārāja, kiñcideva karaṇīyaṁ katvā pamuṭṭhan”ti?

“Āma, bhante”ti.

“Kiṁ nu kho tvaṁ, mahārāja, tasmiṁ samaye acittako ahosī”ti?

“Na hi, bhante, sati tasmiṁ samaye nāhosī”ti.

“Atha kasmā tvaṁ, mahārāja, evamāha—

‘cittena sarati, no satiyā’”ti?

“Kallosi, bhante nāgasenā”ti.

Cirakatasaraṇapañho dasamo.

← Предыдущая сутта Следующая сутта →