4. Bhagavatobrahmacāripañha

kn / mil
Milindapañha · Sativagga

Rājā āha—

“bhante nāgasena, buddho brahmacārī”ti?

“Āma, mahārāja, bhagavā brahmacārī”ti.

“Tena hi, bhante nāgasena, buddho brahmuno sisso”ti?

“Atthi pana te, mahārāja, hatthipāmokkho”ti?

“Atthi, bhante”ti.

“Kiṁ nu kho, mahārāja, so hatthī kadāci karahaci koñcanādaṁ nadatī”ti?

“Āma, bhante, nadatī”ti.

“Tena hi, mahārāja, so hatthī koñcasakuṇassa sisso”ti?

“Na hi, bhante”ti.

“Kiṁ pana, mahārāja, brahmā sabuddhiko abuddhiko”ti?

“Sabuddhiko, bhante”ti.

“Tena hi, mahārāja, brahmā bhagavato sisso”ti.

“Kallosi, bhante nāgasenā”ti.

Bhagavato brahmacāripañho catuttho.

← Предыдущая сутта Следующая сутта →