Paṭhamavagga

“Ayoge yuñjamattānaṁ,

puriso kiccamicchako;

Carañce nādhigaccheyya,

‘taṁ me dubbhagalakkhaṇaṁ’.

Abbūḷhaṁ aghagataṁ vijitaṁ,

Ekañce ossajeyya kalīva siyā;

Sabbānipi ce ossajeyya andhova siyā,

Samavisamassa adassanato.

Yañhi kayirā tañhi vade,

yaṁ na kayirā na taṁ vade;

Akarontaṁ bhāsamānaṁ,

parijānanti paṇḍitā.

Yathāpi ruciraṁ pupphaṁ,

vaṇṇavantaṁ agandhakaṁ;

Evaṁ subhāsitā vācā,

aphalā hoti akubbato.

Yathāpi ruciraṁ pupphaṁ,

Vaṇṇavantaṁ sugandhakaṁ;

Evaṁ subhāsitā vācā,

Saphalā hoti kubbato”ti.

… Subhūto thero ….