Paṭhamavagga

“Disvāna pāṭihīrāni,

gotamassa yasassino;

Na tāvāhaṁ paṇipatiṁ,

issāmānena vañcito.

Mama saṅkappamaññāya,

codesi narasārathi;

Tato me āsi saṁvego,

abbhuto lomahaṁsano.

Pubbe jaṭilabhūtassa,

yā me siddhi parittikā;

Tāhaṁ tadā nirākatvā,

pabbajiṁ jinasāsane.

Pubbe yaññena santuṭṭho,

kāmadhātupurakkhato;

Pacchā rāgañca dosañca,

mohañcāpi samūhaniṁ.

Pubbenivāsaṁ jānāmi,

dibbacakkhu visodhitaṁ;

Iddhimā paracittaññū,

dibbasotañca pāpuṇiṁ.

Yassa catthāya pabbajito,

agārasmānagāriyaṁ;

So me attho anuppatto,

sabbasaṁyojanakkhayo”ti.

… Uruveḷakassapo thero ….