Paṭhamavagga

kn / thag
Theragāthā 6.9 · Chakkanipāta

“Jātimadena mattohaṁ,

bhogaissariyena ca;

Saṇṭhānavaṇṇarūpena,

madamatto acārihaṁ.

Nāttano samakaṁ kañci,

atirekaṁ ca maññisaṁ;

Atimānahato bālo,

patthaddho ussitaddhajo.

Mātaraṁ pitarañcāpi,

aññepi garusammate;

Na kañci abhivādesiṁ,

mānatthaddho anādaro.

Disvā vināyakaṁ aggaṁ,

sārathīnaṁ varuttamaṁ;

Tapantamiva ādiccaṁ,

bhikkhusaṅghapurakkhataṁ.

Mānaṁ madañca chaḍḍetvā,

vippasannena cetasā;

Sirasā abhivādesiṁ,

sabbasattānamuttamaṁ.

Atimāno ca omāno,

pahīnā susamūhatā;

Asmimāno samucchinno,

sabbe mānavidhā hatā”ti.

… Jento purohitaputto thero ….

← Предыдущая сутта Следующая сутта →