Papañcakhayasutta

Evaṁ me sutaṁ—

ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhagavā attano papañcasaññāsaṅkhāpahānaṁ paccavekkhamāno nisinno hoti.

Atha kho bhagavā attano papañcasaññāsaṅkhāpahānaṁ viditvā tāyaṁ velāyaṁ imaṁ udānaṁ udānesi:

“Yassa papañcā ṭhiti ca natthi,

Sandānaṁ palighañca vītivatto;

Taṁ nittaṇhaṁ muniṁ carantaṁ,

Nāvajānāti sadevakopi loko”ti.

Sattamaṁ.