Arahantasutta

“Yo hoti bhikkhu arahaṁ katāvī,

Khīṇāsavo antimadehadhārī;

Ahaṁ vadāmītipi so vadeyya,

Mamaṁ vadantītipi so vadeyyā”ti.

“Yo hoti bhikkhu arahaṁ katāvī,

Khīṇāsavo antimadehadhārī;

Ahaṁ vadāmītipi so vadeyya,

Mamaṁ vadantītipi so vadeyya;

Loke samaññaṁ kusalo viditvā,

Vohāramattena so vohareyyā”ti.

“Yo hoti bhikkhu arahaṁ katāvī,

Khīṇāsavo antimadehadhārī;

Mānaṁ nu kho so upagamma bhikkhu,

Ahaṁ vadāmītipi so vadeyya;

Mamaṁ vadantītipi so vadeyyā”ti.

“Pahīnamānassa na santi ganthā,

Vidhūpitā mānaganthassa sabbe;

Sa vītivatto maññataṁ sumedho,

Ahaṁ vadāmītipi so vadeyya.

Mamaṁ vadantītipi so vadeyya,

Loke samaññaṁ kusalo viditvā;

Vohāramattena so vohareyyā”ti.