Ujjhānasaññisutta

Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

Atha kho sambahulā ujjhānasaññikā devatāyo abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkamiṁsu; upasaṅkamitvā vehāsaṁ aṭṭhaṁsu.

Vehāsaṁ ṭhitā kho ekā devatā bhagavato santike imaṁ gāthaṁ abhāsi:

“Aññathā santamattānaṁ,

aññathā yo pavedaye;

Nikacca kitavasseva,

bhuttaṁ theyyena tassa taṁ.

Yañhi kayirā tañhi vade,

yaṁ na kayirā na taṁ vade;

Akarontaṁ bhāsamānaṁ,

parijānanti paṇḍitā”ti.

“Na yidaṁ bhāsitamattena,

ekantasavanena vā;

Anukkamitave sakkā,

yāyaṁ paṭipadā daḷhā;

Yāya dhīrā pamuccanti,

jhāyino mārabandhanā.

Na ve dhīrā pakubbanti,

viditvā lokapariyāyaṁ;

Aññāya nibbutā dhīrā,

tiṇṇā loke visattikan”ti.

Atha kho tā devatāyo pathaviyaṁ patiṭṭhahitvā bhagavato pādesu sirasā nipatitvā bhagavantaṁ etadavocuṁ:

“accayo no, bhante, accagamā yathābālaṁ yathāmūḷhaṁ yathāakusalaṁ, yā mayaṁ bhagavantaṁ āsādetabbaṁ amaññimhā.

Tāsaṁ no, bhante, bhagavā accayaṁ accayato paṭiggaṇhātu āyatiṁ saṁvarāyā”ti.

Atha kho bhagavā sitaṁ pātvākāsi.

Atha kho tā devatāyo bhiyyoso mattāya ujjhāyantiyo vehāsaṁ abbhuggañchuṁ.

Ekā devatā bhagavato santike imaṁ gāthaṁ abhāsi:

“Accayaṁ desayantīnaṁ,

yo ce na paṭigaṇhati;

Kopantaro dosagaru,

sa veraṁ paṭimuñcatī”ti.

“Accayo ce na vijjetha,

nocidhāpagataṁ siyā;

Verāni na ca sammeyyuṁ,

kenīdha kusalo siyā”ti.

“Kassaccayā na vijjanti,

kassa natthi apāgataṁ;

Ko na sammohamāpādi,

ko ca dhīro sadā sato”ti.

“Tathāgatassa buddhassa,

sabbabhūtānukampino;

Tassaccayā na vijjanti,

tassa natthi apāgataṁ;

So na sammohamāpādi,

sova dhīro sadā satoti.

Accayaṁ desayantīnaṁ,

yo ce na paṭigaṇhati;

Kopantaro dosagaru,

sa veraṁ paṭimuñcati;

Taṁ veraṁ nābhinandāmi,

paṭiggaṇhāmi voccayan”ti.