Sīhasutta

Sāvatthinidānaṁ.

“Sīho, bhikkhave, migarājā sāyanhasamayaṁ āsayā nikkhamati; āsayā nikkhamitvā vijambhati; vijambhitvā samantā catuddisā anuviloketi; samantā catuddisā anuviloketvā tikkhattuṁ sīhanādaṁ nadati; tikkhattuṁ sīhanādaṁ naditvā gocarāya pakkamati.

Ye hi keci, bhikkhave, tiracchānagatā pāṇā sīhassa migarañño nadato saddaṁ suṇanti; yebhuyyena bhayaṁ saṁvegaṁ santāsaṁ āpajjanti; bilaṁ bilāsayā pavisanti; dakaṁ dakāsayā pavisanti; vanaṁ vanāsayā pavisanti; ākāsaṁ pakkhino bhajanti.

Yepi te, bhikkhave, rañño nāgā gāmanigamarājadhānīsu, daḷhehi varattehi baddhā, tepi tāni bandhanāni sañchinditvā sampadāletvā bhītā muttakarīsaṁ cajamānā, yena vā tena vā palāyanti.

Evaṁ mahiddhiko kho, bhikkhave, sīho migarājā tiracchānagatānaṁ pāṇānaṁ, evaṁ mahesakkho, evaṁ mahānubhāvo.

Evameva kho, bhikkhave, yadā tathāgato loke uppajjati arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā. So dhammaṁ deseti:

‘iti rūpaṁ, iti rūpassa samudayo, iti rūpassa atthaṅgamo;

iti vedanā …

iti saññā …

iti saṅkhārā …

iti viññāṇaṁ, iti viññāṇassa samudayo, iti viññāṇassa atthaṅgamo’ti.

Yepi te, bhikkhave, devā dīghāyukā vaṇṇavanto sukhabahulā uccesu vimānesu ciraṭṭhitikā tepi tathāgatassa dhammadesanaṁ sutvā yebhuyyena bhayaṁ saṁvegaṁ santāsaṁ āpajjanti:

‘aniccāva kira, bho, mayaṁ samānā niccamhāti amaññimha.

Addhuvāva kira, bho, mayaṁ samānā dhuvamhāti amaññimha.

Asassatāva kira, bho, mayaṁ samānā sassatamhāti amaññimha.

Mayampi kira, bho, aniccā addhuvā asassatā sakkāyapariyāpannā’ti.

Evaṁ mahiddhiko kho, bhikkhave, tathāgato sadevakassa lokassa, evaṁ mahesakkho, evaṁ mahānubhāvo”ti.

Idamavoca bhagavā …pe…

etadavoca satthā:

“Yadā buddho abhiññāya,

dhammacakkaṁ pavattayi;

Sadevakassa lokassa,

satthā appaṭipuggalo.

Sakkāyañca nirodhañca,

sakkāyassa ca sambhavaṁ;

Ariyañcaṭṭhaṅgikaṁ maggaṁ,

dukkhūpasamagāminaṁ.

Yepi dīghāyukā devā,

vaṇṇavanto yasassino;

Bhītā santāsamāpāduṁ,

sīhassevitare migā.

Avītivattā sakkāyaṁ,

aniccā kira bho mayaṁ;

Sutvā arahato vākyaṁ,

vippamuttassa tādino”ti.

Chaṭṭhaṁ.