Dutiyasamuddasutta

“‘Samuddo, samuddo’ti, bhikkhave, assutavā puthujjano bhāsati.

Neso, bhikkhave, ariyassa vinaye samuddo.

Mahā eso, bhikkhave, udakarāsi mahāudakaṇṇavo.

Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā.

Ayaṁ vuccati, bhikkhave, ariyassa vinaye samuddo.

Etthāyaṁ sadevako loko samārako sabrahmako sassamaṇabrāhmaṇī pajā sadevamanussā yebhuyyena samunnā tantākulakajātā kulagaṇṭhikajātā muñjapabbajabhūtā, apāyaṁ duggatiṁ vinipātaṁ saṁsāraṁ nātivattati …pe….

Santi, bhikkhave, jivhāviññeyyā rasā …pe… santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṁhitā rajanīyā.

Ayaṁ vuccati, bhikkhave, ariyassa vinaye samuddo.

Etthāyaṁ sadevako loko samārako sabrahmako sassamaṇabrāhmaṇī pajā sadevamanussā yebhuyyena samunnā tantākulakajātā kulagaṇṭhikajātā muñjapabbajabhūtā apāyaṁ duggatiṁ vinipātaṁ saṁsāraṁ nātivattatīti.

Yassa rāgo ca doso ca,

Avijjā ca virājitā;

So imaṁ samuddaṁ sagāhaṁ sarakkhasaṁ,

Saūmibhayaṁ duttaraṁ accatari.

Saṅgātigo maccujaho nirupadhi,

Pahāsi dukkhaṁ apunabbhavāya;

Atthaṅgato so na puneti,

Amohayī maccurājanti brūmī”ti.

Dutiyaṁ.