Dutiyadārukkhandhopamasutta

Ekaṁ samayaṁ bhagavā kimilāyaṁ viharati gaṅgāya nadiyā tīre.

Addasā kho bhagavā mahantaṁ dārukkhandhaṁ gaṅgāya nadiyā sotena vuyhamānaṁ.

Disvāna bhikkhū āmantesi:

“passatha no tumhe, bhikkhave, amuṁ mahantaṁ dārukkhandhaṁ gaṅgāya nadiyā sotena vuyhamānan”ti?

“Evaṁ, bhante” …pe…

evaṁ vutte, āyasmā kimilo bhagavantaṁ etadavoca:

“kiṁ nu kho, bhante, orimaṁ tīraṁ …pe…

“katamo ca, kimila, antopūtibhāvo.

Idha, kimila, bhikkhu aññataraṁ saṅkiliṭṭhaṁ āpattiṁ āpanno hoti yathārūpāya āpattiyā na vuṭṭhānaṁ paññāyati.

Ayaṁ vuccati, kimila, antopūtibhāvo”ti.

Pañcamaṁ.