Sabbupādānapariññāsutta

“Sabbupādānapariññāya vo, bhikkhave, dhammaṁ desessāmi.

Taṁ suṇātha.

Katamo ca, bhikkhave, sabbupādānapariññāya dhammo?

Cakkhuñca paṭicca rūpe ca uppajjati cakkhuviññāṇaṁ. Tiṇṇaṁ saṅgati phasso.

Phassapaccayā vedanā.

Evaṁ passaṁ, bhikkhave, sutavā ariyasāvako cakkhusmimpi nibbindati, rūpesupi nibbindati, cakkhuviññāṇepi nibbindati, cakkhusamphassepi nibbindati, vedanāyapi nibbindati.

Nibbindaṁ virajjati; virāgā vimuccati; vimokkhā ‘pariññātaṁ me upādānan’ti pajānāti.

Sotañca paṭicca sadde ca uppajjati …

ghānañca paṭicca gandhe ca …

jivhañca paṭicca rase ca …

kāyañca paṭicca phoṭṭhabbe ca …

manañca paṭicca dhamme ca uppajjati manoviññāṇaṁ. Tiṇṇaṁ saṅgati phasso.

Phassapaccayā vedanā.

Evaṁ passaṁ, bhikkhave, sutavā ariyasāvako manasmimpi nibbindati, dhammesupi nibbindati, manoviññāṇepi nibbindati, manosamphassepi nibbindati, vedanāyapi nibbindati.

Nibbindaṁ virajjati; virāgā vimuccati; vimokkhā ‘pariññātaṁ me upādānan’ti pajānāti.

Ayaṁ kho, bhikkhave, sabbupādānapariññāya dhammo”ti.

Aṭṭhamaṁ.