Dānapāramī 10

“Punāparaṁ yadā homi,

Sasako pavanacārako;

Tiṇapaṇṇasākaphalabhakkho,

Paraheṭhanavivajjito.

Makkaṭo ca siṅgālo ca,

suttapoto cahaṁ tadā;

Vasāma ekasāmantā,

sāyaṁ pāto ca dissare.

Ahaṁ te anusāsāmi,

kiriye kalyāṇapāpake;

‘Pāpāni parivajjetha,

kalyāṇe abhinivissatha’.

Uposathamhi divase,

candaṁ disvāna pūritaṁ;

Etesaṁ tattha ācikkhiṁ,

‘divaso ajjuposatho.

Dānāni paṭiyādetha,

dakkhiṇeyyassa dātave;

Datvā dānaṁ dakkhiṇeyye,

upavassathuposathaṁ’.

Te me sādhūti vatvāna,

yathāsatti yathābalaṁ;

Dānāni paṭiyādetvā,

dakkhiṇeyyaṁ gavesisuṁ.

Ahaṁ nisajja cintesiṁ,

dānaṁ dakkhiṇanucchavaṁ;

‘Yadihaṁ labhe dakkhiṇeyyaṁ,

kiṁ me dānaṁ bhavissati.

Na me atthi tilā muggā,

māsā vā taṇḍulā ghataṁ;

Ahaṁ tiṇena yāpemi,

na sakkā tiṇa dātave.

Yadi koci eti dakkhiṇeyyo,

Bhikkhāya mama santike;

Dajjāhaṁ sakamattānaṁ,

Na so tuccho gamissati’.

Mama saṅkappamaññāya,

sakko brāhmaṇavaṇṇinā;

Āsayaṁ me upāgacchi,

dānavīmaṁsanāya me.

Tamahaṁ disvāna santuṭṭho,

idaṁ vacanamabraviṁ;

‘Sādhu khosi anuppatto,

ghāsahetu mamantike.

Adinnapubbaṁ dānavaraṁ,

ajja dassāmi te ahaṁ;

Tuvaṁ sīlaguṇūpeto,

ayuttaṁ te paraheṭhanaṁ.

Ehi aggiṁ padīpehi,

nānākaṭṭhe samānaya;

Ahaṁ pacissamattānaṁ,

pakkaṁ tvaṁ bhakkhayissasi’.

‘Sādhū’ti so haṭṭhamano,

nānākaṭṭhe samānayi;

Mahantaṁ akāsi citakaṁ,

katvā aṅgāragabbhakaṁ.

Aggiṁ tattha padīpesi,

yathā so khippaṁ mahā bhave;

Phoṭetvā rajagate gatte,

ekamantaṁ upāvisiṁ.

Yadā mahākaṭṭhapuñjo,

āditto dhamadhamāyati;

Taduppatitvā papatiṁ,

majjhe jālasikhantare.

Yathā sītodakaṁ nāma,

Paviṭṭhaṁ yassa kassaci;

Sameti darathapariḷāhaṁ,

Assādaṁ deti pīti ca.

Tatheva jalitaṁ aggiṁ,

paviṭṭhassa mamaṁ tadā;

Sabbaṁ sameti darathaṁ,

yathā sītodakaṁ viya.

Chaviṁ cammaṁ maṁsaṁ nhāruṁ,

Aṭṭhiṁ hadayabandhanaṁ;

Kevalaṁ sakalaṁ kāyaṁ,

Brāhmaṇassa adāsahan”ti.

Sasapaṇḍitacariyaṁ dasamaṁ.

Akittivaggo paṭhamo.

Tassuddānaṁ

Akittibrāhmaṇo saṅkho,

kururājā dhanañcayo;

Mahāsudassano rājā,

mahāgovindabrāhmaṇo.

Nimi candakumāro ca,

sivi vessantaro saso;

Ahameva tadā āsiṁ,

yo te dānavare adā.

Ete dānaparikkhārā,

ete dānassa pāramī;

Jīvitaṁ yācake datvā,

imaṁ pārami pūrayiṁ.

Bhikkhāya upagataṁ disvā,

sakattānaṁ pariccajiṁ;

Dānena me samo natthi,

esā me dānapāramīti.

Dānapāraminiddeso niṭṭhito.