Daṇḍavagga

Sabbe tasanti daṇḍassa,

sabbe bhāyanti maccuno;

Attānaṁ upamaṁ katvā,

na haneyya na ghātaye.

Sabbe tasanti daṇḍassa,

sabbesaṁ jīvitaṁ piyaṁ;

Attānaṁ upamaṁ katvā,

na haneyya na ghātaye.

Sukhakāmāni bhūtāni,

yo daṇḍena vihiṁsati;

Attano sukhamesāno,

pecca so na labhate sukhaṁ.

Sukhakāmāni bhūtāni,

yo daṇḍena na hiṁsati;

Attano sukhamesāno,

pecca so labhate sukhaṁ.

Māvoca pharusaṁ kañci,

vuttā paṭivadeyyu taṁ;

Dukkhā hi sārambhakathā,

paṭidaṇḍā phuseyyu taṁ.

Sace neresi attānaṁ,

kaṁso upahato yathā;

Esa pattosi nibbānaṁ,

sārambho te na vijjati.

Yathā daṇḍena gopālo,

gāvo pājeti gocaraṁ;

Evaṁ jarā ca maccu ca,

āyuṁ pājenti pāṇinaṁ.

Atha pāpāni kammāni,

karaṁ bālo na bujjhati;

Sehi kammehi dummedho,

aggidaḍḍhova tappati.

Yo daṇḍena adaṇḍesu,

appaduṭṭhesu dussati;

Dasannamaññataraṁ ṭhānaṁ,

khippameva nigacchati.

Vedanaṁ pharusaṁ jāniṁ,

sarīrassa va bhedanaṁ;

Garukaṁ vāpi ābādhaṁ,

cittakkhepaṁ va pāpuṇe.

Rājato vā upasaggaṁ,

Abbhakkhānaṁ va dāruṇaṁ;

Parikkhayaṁ va ñātīnaṁ,

Bhogānaṁ va pabhaṅguraṁ.

Atha vāssa agārāni,

aggi ḍahati pāvako;

Kāyassa bhedā duppañño,

nirayaṁ sopapajjati.

Na naggacariyā na jaṭā na paṅkā,

Nānāsakā thaṇḍilasāyikā vā;

Rajojallaṁ ukkuṭikappadhānaṁ,

Sodhenti maccaṁ avitiṇṇakaṅkhaṁ.

Alaṅkato cepi samaṁ careyya,

Santo danto niyato brahmacārī;

Sabbesu bhūtesu nidhāya daṇḍaṁ,

So brāhmaṇo so samaṇo sa bhikkhu.

Hirīnisedho puriso,

koci lokasmi vijjati;

Yo niddaṁ apabodheti,

asso bhadro kasāmiva.

Asso yathā bhadro kasāniviṭṭho,

Ātāpino saṁvegino bhavātha;

Saddhāya sīlena ca vīriyena ca,

Samādhinā dhammavinicchayena ca;

Sampannavijjācaraṇā patissatā,

Jahissatha dukkhamidaṁ anappakaṁ.

Udakañhi nayanti nettikā,

Usukārā namayanti tejanaṁ;

Dāruṁ namayanti tacchakā,

Attānaṁ damayanti subbatā.

Daṇḍavaggo dasamo.