Sādhusutta

Sāvatthinidānaṁ.

Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ aṭṭhaṁsu.

Ekamantaṁ ṭhitā kho ekā devatā bhagavato santike imaṁ udānaṁ udānesi:

“Sādhu kho mārisa dānaṁ,

maccherā ca pamādā ca;

Evaṁ dānaṁ na dīyati,

puññaṁ ākaṅkhamānena;

Deyyaṁ hoti vijānatā”ti.

Atha kho aparā devatā bhagavato santike imaṁ udānaṁ udānesi:

“Sādhu kho mārisa dānaṁ,

Api ca appakasmimpi sāhu dānaṁ.

Appasmeke pavecchanti,

bahuneke na dicchare;

Appasmā dakkhiṇā dinnā,

sahassena samaṁ mitā”ti.

Atha kho aparā devatā bhagavato santike imaṁ udānaṁ udānesi:

“Sādhu kho mārisa dānaṁ,

Appakasmimpi sāhu dānaṁ;

Api ca saddhāyapi sāhu dānaṁ,

Dānañca yuddhañca samānamāhu;

Appāpi santā bahuke jinanti,

Appampi ce saddahāno dadāti;

Teneva so hoti sukhī paratthā”ti.

Atha kho aparā devatā bhagavato santike imaṁ udānaṁ udānesi:

“Sādhu kho mārisa dānaṁ,

Appakasmimpi sāhu dānaṁ;

Saddhāyapi sāhu dānaṁ,

Api ca dhammaladdhassāpi sāhu dānaṁ.

Yo dhammaladdhassa dadāti dānaṁ,

Uṭṭhānavīriyādhigatassa jantu;

Atikkamma so vetaraṇiṁ yamassa,

Dibbāni ṭhānāni upeti macco”ti.

Atha kho aparā devatā bhagavato santike imaṁ udānaṁ udānesi:

“Sādhu kho mārisa dānaṁ,

Appakasmimpi sāhu dānaṁ;

Saddhāyapi sāhu dānaṁ,

Dhammaladdhassāpi sāhu dānaṁ;

Api ca viceyya dānampi sāhu dānaṁ.

Viceyya dānaṁ sugatappasatthaṁ,

Ye dakkhiṇeyyā idha jīvaloke;

Etesu dinnāni mahapphalāni,

Bījāni vuttāni yathā sukhette”ti.

Atha kho aparā devatā bhagavato santike imaṁ udānaṁ udānesi:

“Sādhu kho mārisa dānaṁ,

Appakasmimpi sāhu dānaṁ;

Saddhāyapi sāhu dānaṁ,

Dhammaladdhassāpi sāhu dānaṁ;

Viceyya dānampi sāhu dānaṁ,

Api ca pāṇesupi sādhu saṁyamo.

Yo pāṇabhūtāni aheṭhayaṁ caraṁ,

Parūpavādā na karonti pāpaṁ;

Bhīruṁ pasaṁsanti na hi tattha sūraṁ,

Bhayā hi santo na karonti pāpan”ti.

Atha kho aparā devatā bhagavantaṁ etadavoca:

“kassa nu kho, bhagavā, subhāsitan”ti?

“Sabbāsaṁ vo subhāsitaṁ pariyāyena, api ca mamapi suṇātha—

Saddhā hi dānaṁ bahudhā pasatthaṁ,

Dānā ca kho dhammapadaṁva seyyo;

Pubbe ca hi pubbatare ca santo,

Nibbānamevajjhagamuṁ sapaññā”ti.