Buddhavandanāsutta

Sāvatthiyaṁ jetavane.

Tena kho pana samayena bhagavā divāvihāragato hoti paṭisallīno.

Atha kho sakko ca devānamindo brahmā ca sahampati yena bhagavā tenupasaṅkamiṁsu; upasaṅkamitvā paccekaṁ dvārabāhaṁ nissāya aṭṭhaṁsu.

Atha kho sakko devānamindo bhagavato santike imaṁ gāthaṁ abhāsi:

“Uṭṭhehi vīra vijitasaṅgāma,

Pannabhāra anaṇa vicara loke;

Cittañca te suvimuttaṁ,

Cando yathā pannarasāya rattin”ti.

“Na kho, devānaminda, tathāgatā evaṁ vanditabbā.

Evañca kho, devānaminda, tathāgatā vanditabbā:

‘Uṭṭhehi vīra vijitasaṅgāma,

Satthavāha anaṇa vicara loke;

Desassu bhagavā dhammaṁ,

Aññātāro bhavissantī’”ti.