Paccanīkasutta

Sāvatthinidānaṁ.

Tena kho pana samayena paccanīkasāto nāma brāhmaṇo sāvatthiyaṁ paṭivasati.

Atha kho paccanīkasātassa brāhmaṇassa etadahosi:

“yannūnāhaṁ yena samaṇo gotamo tenupasaṅkameyyaṁ.

Yaṁ yadeva samaṇo gotamo bhāsissati taṁ tadevassāhaṁ paccanīkāssan”ti.

Tena kho pana samayena bhagavā abbhokāse caṅkamati.

Atha kho paccanīkasāto brāhmaṇo yena bhagavā tenupasaṅkami; upasaṅkamitvā bhagavantaṁ caṅkamantaṁ etadavoca:

“bhaṇa samaṇadhamman”ti.

“Na paccanīkasātena,

suvijānaṁ subhāsitaṁ;

Upakkiliṭṭhacittena,

sārambhabahulena ca.

Yo ca vineyya sārambhaṁ,

appasādañca cetaso;

Āghātaṁ paṭinissajja,

sa ve jaññā subhāsitan”ti.

Evaṁ vutte, paccanīkasāto brāhmaṇo bhagavantaṁ etadavoca:

“abhikkantaṁ, bho gotama, abhikkantaṁ, bho gotama …pe…

upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.