Dutiyaariyāvāsasutta

Ekaṁ samayaṁ bhagavā kurūsu viharati kammāsadhammaṁ nāma kurūnaṁ nigamo.

Tatra kho bhagavā bhikkhū āmantesi …pe….

“Dasayime, bhikkhave, ariyāvāsā, ye ariyā āvasiṁsu vā āvasanti vā āvasissanti vā.

Katame dasa?

Idha, bhikkhave, bhikkhu pañcaṅgavippahīno hoti, chaḷaṅgasamannāgato, ekārakkho, caturāpasseno, paṇunnapaccekasacco, samavayasaṭṭhesano, anāvilasaṅkappo, passaddhakāyasaṅkhāro, suvimuttacitto, suvimuttapañño.

Kathañca, bhikkhave, bhikkhu pañcaṅgavippahīno hoti?

Idha, bhikkhave, bhikkhuno kāmacchando pahīno hoti, byāpādo pahīno hoti, thinamiddhaṁ pahīnaṁ hoti, uddhaccakukkuccaṁ pahīnaṁ hoti, vicikicchā pahīnā hoti.

Evaṁ kho, bhikkhave, bhikkhu pañcaṅgavippahīno hoti.

Kathañca, bhikkhave, bhikkhu chaḷaṅgasamannāgato hoti?

Idha, bhikkhave, bhikkhu cakkhunā rūpaṁ disvā neva sumano hoti na dummano, upekkhako viharati sato sampajāno.

Sotena saddaṁ sutvā …

ghānena gandhaṁ ghāyitvā …

jivhāya rasaṁ sāyitvā …

kāyena phoṭṭhabbaṁ phusitvā …

manasā dhammaṁ viññāya neva sumano hoti na dummano, upekkhako viharati sato sampajāno.

Evaṁ kho, bhikkhave, bhikkhu chaḷaṅgasamannāgato hoti.

Kathañca, bhikkhave, bhikkhu ekārakkho hoti?

Idha, bhikkhave, bhikkhu satārakkhena cetasā samannāgato hoti.

Evaṁ kho, bhikkhave, bhikkhu ekārakkho hoti.

Kathañca, bhikkhave, bhikkhu caturāpasseno hoti?

Idha, bhikkhave, bhikkhu saṅkhāyekaṁ paṭisevati, saṅkhāyekaṁ adhivāseti, saṅkhāyekaṁ parivajjeti, saṅkhāyekaṁ vinodeti.

Evaṁ kho, bhikkhave, bhikkhu caturāpasseno hoti.

Kathañca, bhikkhave, bhikkhu paṇunnapaccekasacco hoti?

Idha, bhikkhave, bhikkhuno yāni tāni puthusamaṇabrāhmaṇānaṁ puthupaccekasaccāni, seyyathidaṁ:

‘sassato loko’ti vā, ‘asassato loko’ti vā, ‘antavā loko’ti vā, ‘anantavā loko’ti vā, ‘taṁ jīvaṁ taṁ sarīran’ti vā, ‘aññaṁ jīvaṁ aññaṁ sarīran’ti vā, ‘hoti tathāgato paraṁ maraṇā’ti vā, ‘na hoti tathāgato paraṁ maraṇā’ti vā, ‘hoti ca na ca hoti tathāgato paraṁ maraṇā’ti vā, ‘neva hoti na na hoti tathāgato paraṁ maraṇā’ti vā,

sabbāni tāni nunnāni honti paṇunnāni cattāni vantāni muttāni pahīnāni paṭinissaṭṭhāni.

Evaṁ kho, bhikkhave, bhikkhu paṇunnapaccekasacco hoti.

Kathañca, bhikkhave, bhikkhu samavayasaṭṭhesano hoti?

Idha, bhikkhave, bhikkhuno kāmesanā pahīnā hoti, bhavesanā pahīnā hoti, brahmacariyesanā paṭippassaddhā.

Evaṁ kho, bhikkhave, bhikkhu samavayasaṭṭhesano hoti.

Kathañca, bhikkhave, bhikkhu anāvilasaṅkappo hoti?

Idha, bhikkhave, bhikkhuno kāmasaṅkappo pahīno hoti, byāpādasaṅkappo pahīno hoti, vihiṁsāsaṅkappo pahīno hoti.

Evaṁ kho, bhikkhave, bhikkhu anāvilasaṅkappo hoti.

Kathañca, bhikkhave, bhikkhu passaddhakāyasaṅkhāro hoti?

Idha, bhikkhave, bhikkhu sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.

Evaṁ kho, bhikkhave, bhikkhu passaddhakāyasaṅkhāro hoti.

Kathañca, bhikkhave, bhikkhu suvimuttacitto hoti?

Idha, bhikkhave, bhikkhuno rāgā cittaṁ vimuttaṁ hoti, dosā cittaṁ vimuttaṁ hoti, mohā cittaṁ vimuttaṁ hoti.

Evaṁ kho, bhikkhave, bhikkhu suvimuttacitto hoti.

Kathañca, bhikkhave, bhikkhu suvimuttapañño hoti?

Idha, bhikkhave, bhikkhu ‘rāgo me pahīno ucchinnamūlo tālāvatthukato anabhāvaṅkato āyatiṁ anuppādadhammo’ti pajānāti, doso me pahīno …pe… ‘moho me pahīno ucchinnamūlo tālāvatthukato anabhāvaṅkato āyatiṁ anuppādadhammo’ti pajānāti.

Evaṁ kho, bhikkhave, bhikkhu suvimuttapañño hoti.

Ye hi keci, bhikkhave, atītamaddhānaṁ ariyā ariyāvāse āvasiṁsu, sabbe te imeva dasa ariyāvāse āvasiṁsu;

ye hi keci, bhikkhave, anāgatamaddhānaṁ ariyā ariyāvāse āvasissanti, sabbe te imeva dasa ariyāvāse āvasissanti;

ye hi keci, bhikkhave, etarahi ariyā ariyāvāse āvasanti, sabbe te imeva dasa ariyāvāse āvasanti.

Ime kho, bhikkhave, dasa ariyāvāsā, ye ariyā āvasiṁsu vā āvasanti vā āvasissanti vā”ti.

Dasamaṁ.

Nāthavaggo dutiyo.

Tassuddānaṁ

Senāsanañca pañcaṅgaṁ,

Saṁyojanākhilena ca;

Appamādo āhuneyyo,

Dve nāthā dve ariyāvāsāti.